VHP bayram aksiyası keçirdi - Fotolar

Vətəndaş Həmrəyliyi Partiyasının (VHP) üzvləri 28 May -Cümhuriyyət günü ilə bağlı Rəsulzadə heykəlinin önündə bayram aksiyası keçirib.

Partiyanın mətbuat xidmətindən AzNews.az-a verilən məlumata görə, keçmiş Şin Zavodunun həyətindəki aksiya bu gün saat 13:00-da baş tutub.

Tədbirdə VHP Mərkəzi İcra Aparatının rəhbəri Samir Əsədli çıxış edib və Şərqin ilk demokratik respublikası – Azərbaycan Xalq Cümhüriyyətinin yaranmasından, qısa vaxtda böyük uğurlara imza atmasından, ilk dəfə qadınlara seçim hüququ tanımasından, ordu quruculuğu və apardığı siyasi-hərbi mücadilədən danışıb: "Təəssüf ki, AXC gərgin və mürəkkəb ictimai-siyasi şəraitdə cəmi 23 ay fəaliyyət göstərə bildi və bolşeviklər tərəfindən devrildi. Sovet imperiyası Azərbaycanı məcburi surətdə öz tərkibinə daxil etdi. Buna baxmayaraq, istiqlal ideyası yenilmədi və 1991-ci ildə Azərbaycan yenidən öz müstəqilliyini bərpa etdi".

Tədbirdə həmçinin VHP Mərkəzi Nəzarət Təftiş Komissiyasının sədri Felmar Ələkbərli və VHP Ağsaqqallar Şurasının sədri Sabir Həsənov və gənc fəallar çıxış edib, Xalq Cümhuriyyətinin Azərbaycan tarixindəki rolu və mövqeyindən bəhs ediblər.