Azərbaycanda dövlət pensiyaları daha artırmayacaq

Azərbaycan hökuməti pensiyaların maliyyələşdirilməsindən imtina etmək istəyir.

Fins.az-ın "Fineko" agentliyinə istinadən verdiyi xəbərə görə, bu barədə Dövlət Sosial Müdafiə Fondunun sədri Elman Mehdiyev məlumat verib.

Onun sözlərinə görə, sığorta-pensiya sistemində həyata keçirilən islahatlar çərçivəsində pensiyaların birtərəfli qaydada dövlət tərəfindən maliyyələşdirilməsinə dair SSRİ dövründən qalma mexanizmin ləğv edilməsi nəzərdə tutulub: "Azərbaycanda bazar iqtisadiyyatı olduğu üçün biz bu mexanizmdən imtina edəcəyik. Və bu, ölkədə pensiya-sığorta sistemini inkişaf etdirməyin yeganə yoludur".

Yeni formalaşdırılan sistemə görə, pensiyalar yalnız işləyən vətəndaşların hər ay maaşından ayrılan sosial sığorta yığımları (pensiya kapitalı) əsasında veriləcək və artırılacaq.