“Bizə psixoloji təzyiq göstərirdilər” - Erməni məşqçidən etiraf

Ermənistan yığmasının müxtəlif idman növləri üzrə baş məşqçiləri Birinci Avropa Oyunlarında uğursuz çıxışlarının səbəblərini açıqlayıblar.

AzNews.az Ermənistan KİV-ə istinadən xəbər verir ki, onlar 26 idmançının iştirak etdiyi Oyunlarda cəmi bir gümüş medal qazanmalarını ölkələrində olan psixoloji təzyiqlə əlaqələndiriblər.

Sambo üzrə baş məşqçi Levon Ayrapetyan deyib ki, məğlubiyyətləri Ermənistandan başlayıb:

"Bizim məğlubiyyətimiz Ermənistandan başladı. Bizi Bakıya getməkdə günahlandırmağa başladılar və bunu milli məsələyə çevirdilər.
Psixoloji təzyiq göstərməyə başladılar. Bəli, uğursuzluğun əsas səbəbini burda görürəm. Elə buna görə də ilk dəfə olaraq sambo üzrə yığmamız vətənə medalsız döndü".

Sərbəst güləş üzrə məşqçi Araik Baqdadyan isə deyib ki, 2007-ci ildə də Bakıda olublar, amma bu dəfə hər şey çox yüksək səviyyədə təşkil olunmuşdu.

"Biz sərbəst güləşdə altı idmançı ilə təmsil olunduq, təəssüf ki, medal qazana bilmədik. İdmançılara haqq qazandırmıram, mən baş məşqçi kimi razı deyiləm".

Onun sözlərinə görə, Bakıda hər şey onların gözlədiklərindən də daha yaxşı olub.

Boks üzrə baş məşqçi Karen Aqamalyan isə Bakıda anti-erməniliklə heç nə hiss etmədiklərini vurğulayıb:

"Nə Olimpiya kəndində, nə də yeməkxanada. Hər şey normal idi".