Bakıda avtobusların hərəkəti üçün xüsusi hərəkət zolaqları çəkilir. Bakıda avtobusların hərəkəti üçün xüsusi hərəkət zolaqları çəkilir.

Bu yola girmək qadağandır - 40 manat cərimə

Bakıda avtobusların hərəkəti üçün xüsusi hərəkət zolaqları çəkilir.

Bu haqda Modern.az-a məlumat verən Bakı Nəqliyyat Agentliyinin (BNA) İctimai əlaqələr və maarifləndirmə şöbəsinin müdiri Mais Ağayev deyib ki, ilkin olaraq 9 ünvanda bu cür zolaqların çəkilməsi nəzərdə tutulub:

“Babək, Xocalı, Nobel, Gəncə prospektlərində, Füzuli, M.Useynov, Ə.Rəcəbli, M.Əliyev və Y.Səfərov küçələrində avtobus zolaqları çəkiləcək. Artıq Fizuli və Yusif Səfərov küçələrində zolaqlar çəkilib, nişanlama aparılıb. Yola 5.9 nişanı (xüsusi avtobus zolağı) qoyulub. Bu o deməkdir ki, həmin yolda xidmət edən sərnişin avtobuslarından başqa, digər nəqliyyat vasitələrinin hərəkəti qadağandır. Qaydanı pozanlar isə 40 manat cərimə olunacaqlar”.

M.Ağayev bildirib ki, hazırda Bakının inzibati ərazisində araşdırma aparılır:

“Üç və daha artıq hərəkət zolağı olan küçə və prospektlərdə bu cür avtobuslar üçün xüsusi yol olacaq. Amma iki hərəkət istiqaməti olan küçələrdə bu cür zolaqların çəkilməsi məsləhət deyil. Onsuz da həmin ərazilərdə sıxlıq çoxdur və zolağın olması da əlavə gərginliyə səbəb olar”.

Cərimələrə gəldikdə, qurum rəsmisi qeyd edib ki, çəkilən zolaqdan yalnız həmin küçədən keçən marşrut xətləri istifadə edə bilər:

“Məsələn, “28 May” küçəsində hərəkət edən avtobus təsadüfən Yusif Səfərov küçəsinə giribsə belə, onun hərəkəti qadağandır və cərimə olunacaq. Həmin küçədə xidmət edən avtobus, hərəkətdə olarkən, habelə, dayanacağa girərkən zolaqda olan digər avtobusu keçə bilməz. Bu təyin olunmuş marşrut xəttinin pozulması deməkdir və keçdiyi halda 40 manat cərimə nəzərdə tutulub.

Bu zolaqda yalnız operativ nəqliyyat vasitələri - təcili yardım maşını, yanğınsöndürən maşın və polis istifadə edə bilər. Digər nəqliyyat vasitələrinin bu xətt boyunca hərəkəti qadağandır. Eyni zamanda, yalnız müəyyən olunmuş qırıq-qırıq cizgilər olan yerdə digər nəqliyyat vasitələri məhlələrə girib-çıxa bilərlər”.

AzNews.az