Jurnalistlər Şahdağa qalxacaq

Azərbaycanda əksəriyyət jurnalistinin təmsil olunduğu “Mətbuat qeyri-rəsmi” Qrupu (MQR) missiyasını davam etdirərək media nümayəndələrinin növbəti gəzintisini təşkil edir.

MQR-dan AzNews.az-a verilən məlumata görə, bu dəfə qış gəzintisi Azərbaycanın turizm bölgələrindən olan Qusarda təşkil ediləcək. Fevralın 16-17-də baş tutacaq səfər çərçivəsində Qusarın maraqlı yerləri, o cümlədən yeni istifadəyə verilən Şahdağ Qış-Yay turizm kompleksi ilə tanış olunacaq, dağlar üzərində xizək və kanatlar ilə gəzinti təşkil olunacaq. Eyni zamanda həmişə olduğu kimi jurnalistləri səfər çərçivəsində maraqlı əyləncə, rəqslər və bir sözlə maraqlı qış istirahəti gözləyir. Səfər jurnalistlərin özlərinin şəxsi hesabına maliyyələşir.

Səfərdə 30 nəfər olmaqla iştirak edəcək jurnalistlər siyahısına Xəzər TV, ANS, İctimai TV, AzTV, ATV, Səs TV, APA, Trend informasiya agentliklərinin, o cümlədən AzNews.az, Lent.az, Qafqazinfo.az, Modern.az, Mediaforum.az, Publika.az saytlarının, bundan başqa "Gündəlik teleqraf" və digər qəzetlərin əməkdaşları daxildir. Səfərdə müstəqil yazarlar və jurnalistlər də iştirak edirlər.
Qeyd edək ki, jurnalistlərdən Murad Əliyev, Mübariz Aslanov və Yelena Sidorenkonun təsisçiliyi ilə yaradılan "Mətbuat qeyri-rəsmi" Qrupunun əsası 2012-ci ilin ilin yay aylarında sosial şəbəkələrdə media nümayəndələrinin istirahətinin təşkili məqsədilə təşəbbüs formasında qoyulub. Sonralar bu təşəbbüsün jurnalistlərin arasında geniş rezonans yaratması nəticəsində Qrup fəaliyyətini adına uyğun qeyri-rəsmi formada bir qədər genişləndirib: mütəmadi olaraq Azərbaycanın, eləcə də xarici ölkələrin maraqlı bölgələri ilə Azərbaycan jurnalistlərinin tanışlığı məqsədini qarşıya qoyub. Bura eyni zamanda jurnalistlərin işdən sonra peşə fəaliyyətində təcrübə mübadiləsi, dünya ölkələri jurnalistləri ilə sıx peşə əməkdaşlığı, təcrübə mübadiləsi, eyni zamanda jurnalistlərin kollektiv istirahəti də daxildir.

Qrupun Təşkilat Komitəsi mövcuddur və bura təsisçi jurnalistlər Mübariz Aslanov və Murad Əliyev daxildir. Hazırda Qrupun Azərbaycan və Türkiyə mətbuatı da daxil olmaqla 250-dən çox üzvü var.

AzNews.az