05:52
(077) 610-22-33

Vaqif Əsədov yol polisini təhqir edən müğənniyə cavab verdi

  • >
32 175 19 İyun 14:04 | Cəmiyyət

“Eurovision 2011” qalibi Nigar Camal Dövlət Yol Polisi əməkdaşlarını təhqir edib.

AzNews.az xəbər verir ki, müğənni Dövlət Yol Polis əməkdaşlarının qaydalarını pozduğunu bildirib:

“DYP – axır zamanlar çox qudurublar. Daha susmaq istəmirəm. İdeal olmasam da həmişə qaydalara əməl etməyə çalışıram. Qaydanı da pozanda deyirəm ki, cəriməmi yazın. Sənədlərim də həmişə qaydasında olur. Amma bütün bunlara bizim DYP əhəmiyyət vermir. Onlar yollarda təhlükəsizliyi təmin etmək əvəzinə, özləri qaydaları pozurlar. Düz getdiyin yolda səni səbəbsiz yerə saxlayırlar. Xüsusilə axşam saatlarında ümumiyyətlə maşın sürmək mümkün deyil. Yolda “inomarka” görən kimi arxasınca sürüb saxlatdırırlar. Birinci kobud formada kəmərə ilişirlər. Sonra da spirtli içkiyə. Əmin edirsən ki, spirtli içki qəbul etməmisən, sənədlərin də qaydasındadır. Belə olanda da deyirlər ki, sizin bir cəriməniz var, maşınınızı meydançaya götürməliyik. “Cərimənizi ödəyin” demək əvəzinə, maşını aparmaq, sürücülük vəsiqəsini almaq istəyirlər.

Mənim sürücülük vəsiqəm Böyük Britaniyaya aiddir, alsan nə olacaq ki? Sadəcə, 20 dəqiqə yolda vaxt itirirsən. Səhər yenə saxlayırlar. Düşündük ki, yenə kəmərə ilişəcəklər. Amma bu dəfə qəsdən deyir ki, telefonla danışırdız. Soruşuram ki, siz telefonu harda gördüz? Deyir ki, əlinizdə tutmusuz. Telefonun arxa oturacaqda çantamda olduğunu göstərirəm. Çarəsiz qalanda da deyir ki, “Bəs siz polisin “saxla” əmrinə vaxtında əməl etməmisiz”. Kəmər, telefon, indi də sizin “müqəddəs taxta”nız? İzah edirəm ki, yolda maşın onsuz da çoxdu, mən diqqətimi sizin sifətinizə yox, yola yönəltməyə çalışıram. 100 manat cərimə yazmaq istəyəndə də deyirəm ki, bayaqdan sizi kamera çəkirdi. Bunu eşidən kimi dərhal danışıq tonu dəyişdi, üzündə gülüş, zarafat. Məni də xoşluqla buraxdılar”.

Bakı Şəhər Baş Polis İdarəsinin Dövlət Yol Polisi İdarəsinın bölmə rəisi polis polkovniki Vaqif Əsədov isə müğənni Nigar Camalın bu hərəkətini təəssüf hissi ilə qarşıladığını vurğulayıb:

“Onunla əlaqə saxlamaq mümkün olmayıb. Müğənni iddia etdiyi vəziyyətlə bağlı araşdırılma aparılması üçün Bakı Şəhər BPİ DYP-yə müraciət etməlidir. Onun status paylaşmasını dərin təəssüf hissi ilə qarşılayırıq. O ki, qaldı müğənninin yol polisi haqqında kobud ifadə işlətməsinə, hesab edirik, bu, düzgün və inandırıcı deyil”.

Bahar RÜSTƏMLİ

AzNews.az

Bağla X