04:01
(077) 610-22-33

“Gülər Əhmədova balaca oğlundan narahatdır”

  • >
299 1 Mart 2013 15:35 | Cəmiyyət

Sabiq millət vəkili Gülər Əhmədovanın vəkili Eldar Qədimi bu gün onunla görüşüb. Eldar Qədiminin Modern.az-a verdiyi məlumata görə, Gülər Əhmədova ilə görüş zamanı bir çox məsələlərdən danışılıb.

Görüş zamanı sabiq millət vəkilinin səhhətindən və istintaqın gedişi barədə söhbət etdiklərini deyən Eldar Qədiminin sözlərinə görə, istintaq barədə müəyyən narazılıqlar var. Onun dediyinə görə, istintaq yalnız videomateriallar əsasında qurulub. Eldar Qədimi bildirib ki, videomateriallar istintaq işinin açılması üçün əsas verməməli idi. İstintaq materialları ilə tanış olmadığını söyləyən vəkil onu da bildirib ki, yalnız sənədlərlə tanış olduqdan sonra bu barədə nə isə deyə bilər:

"İstintaqdan razıyıq, ya narazıyıq, – bunu deyə bilmərəm. Çünki istintaq materialları ilə tanış deyiləm. Amma hələ ki, gözləmə mövqeyindəyik. Həmin materiallar bizə təqdim olunandan sonra nə isə deyə bilərik. İstintaqın gedişindən yalnız bir şeydən narahatıq ki, nə qədər ki, Elşad Abdullayevlə üzləşmə olmayıb? nəinki Gülər Əhmədova, hətta mən də hesab edirəm ki, bu istintaq hərəkətləri düzgün deyil. Elə məsələlər var ki, gələcəkdə qaldırılacaq. Gülər Əhmədova bildirib ki, heç vaxt heç kimdən heç nə almamışam, heç nə də verməmişəm. Məni öldürsələr belə, heç kimə şər atmaram. Həmin məsələlərin qaldırılacağı vaxt gələndə ya məndən, ya da elə oradan eşidəcəksiniz. Bu barədə hamının məlumatı olacaq".

Sabiq millət vəkilinin ailəsi ilə görüşməsi barədə də danışan Eldar Qədimi qeyd edib ki, Gülər Əhmədova hələ ki, yaxınlarından heç kimlə görüşməyib. Onun sözlərinə görə, istintaq orqanları rəsmi şəkildə məktubla icazə versə, Gülər Əhmədova ailəsi və yaxınları ilə görüşə bilər.

"Gülər Əhmədova ilk növbədə balaca oğlundan narahatdır. Kiçik övladı balaca olduğundan qohumlarının yanında qalır. Bir gün orda, bir gün burda. Ona görə də oğlundan nigarandır. Gülər Əhmədova səhhətindən də şikayətlənib".

AzNews.az
Bağla X