22:37
(077) 610-22-33

Nazir müavini: "Hüquq-mühafizə orqanlarına müraciət edəcəyik”

  • >
363 17 Dekabr 2013 11:13 | Cəmiyyət

"Ekologiya və Təbii Sərvətlər Nazirliyinin nümayəndələri tərəfindən guya Alpinizm federasiyasının hansısa tədbir keçirmək cəhdləri zamanı kimlərinsə iplərinin kəsilməsi və yandırılması, onların həyatlarına təhlükə yaradılması barədə iddialar cəfəng və axmaq uydurmadır".

Bu sözləri AzNews.az-a Ekologiya və Təbii Sərvətlər nazirinin müavini Firdovsi Əliyev deyib.

F. Əliyev bildirib ki, bu böhtan xarakterli ittihamları qətiyyətlə rədd edirlər:

"Nazirliyin əməkdaşlarının bir dəstənin özbaşına tədbirinə guya mane olması barədə deyilənlər həyasızcasına uydurulmuş yalandır və ölkənin dövlət qurumlarına qarşı yönəlmiş provakasiyadır. Böhtan xarakterli ittihamları qətiyyətlə rədd edirik və bunu hər hansı bir dəstənin dövlət qurumlarına ünvanlanan növbəti qarayaxma aksiyası kimi qiymətləndiririk. Bu situasiyaya əslində ETSN-nin heç bir aidiyyəti yoxdur və bu qondarma təşkilatın növbəti qara piar kampaniyasıdır.

Şüurlu, məqsədli ağ yalandır, hər şey də yalan üzərində qurulub. Baş verənlər yerli orqanlar tərəfindən hansısa dəstənin özbaşınalığına qarşı atılan tamamilə qanuni addımdır və gözlənilən reaksiyadır. Bildiyimizə görə, hadisələrdə heç bir qanunsuzluğa yol verilməyib, əksinə bu, dəstənin özbaşına hərəkətlərinə yerli orqanların qanuni cavabıdır".

F.Əliyev bildirib ki, məqsədli surətdə provakasiya yaratmaq üçün atılacaq addımların doğuracaq reaksiyasını əvvəlcədən bilərək uydurma bəyanatlara əsas yaratmaq niyyəti ilə 20-25 nəfərlik dəstə, guya hansısa tədbir keçirmək üçün heç kəsə demədən Qusarın Ləzə kəndinə gedib.

Məlumatsız olan yerli orqanlar müvafiq strukturlara, o cümlədən Gənclər və İdman Nazirliyinə müraciət edib. Məlum olub ki, idman nazirliyi ilə də heç bir tədbirin keçirilməsi razılaşdırılmayıb.

Təbii ki, yerli bələdiyyə adekvat addımlar ataraq bu dəstənin özbaşına hərəkətlərinin qarşısını almaq üçün yerli icra orqanlarına və ekologiya nazirliyinin ərazi şöbəsinə müraciət edib. Yerli icra orqanları bunun qarşısını alıb. Əfsuslar olsun ki, ETSN-nin işçiləri hadisə yerinə gəlib çata bilməyib.

Çünki Ləzə kəndinin bələdiyyəsi qayalıqların özbaşına çapılması, oyularaq dəmir-metal alətlərlə zədələnməsi ilə bağlı tədbir görülməsi üçün müvafiq olaraq ETSN-nin ərazi ekologiya şöbəsinə rəsmi məktubla müraciət etsə də, müraciət Nazirliyin ərazi şöbəsinə gec daxil olub.

Nazirliyin əməkdaşları gedib araşdırma aparmağa macal tapmayıb. Buna baxmayaraq, müraciətə operativ cavab vermədikləri üçün ərazi şöbəsinin əməkdaşlarına qarşı cəza tədbiri görüləcək.
Nazir müavini qeyd edib ki, baş verənlər ancaq provakasiya yaratmaqdır:

"Belə olmasaydı bu dəstə ölkədə idman siyasətini həyata keçirən Gənclər və İdman Nazirliyi tərəfindən keçirilməsi təsdiq olunmuş, vaxtı xeyli əvvəldən müəyyənləşdirilmiş Azərbaycan Hava və Ekstremal İdman Növləri Federasiyasının milli çempionatına qarşı çıxıb. Tez-tələsik yarış adı altında gülünc tədbirlərini eyni günə salmazdı.

Zaman da göstərdi ki, bunların məqsədləri yarış keçirmək deyildi, milli çempionatı sabotaj etmək idi. Əminəm ki, həmin yerdə guya idmançıların ipinin kəsilməsi, yandırılması, buna görə yalandan hay-haray salınması da onların öz işidir. Bir daha bəyan edirik ki, ETSN-nin əməkdaşları sözügedən ərazidə olmayıb.

Bu şərçi dəstənin məqsədli, iyrənc oyunları nazirliyə böhtan atmağa hesablanıb. ETSN-yə qarşı aparılan şər-böhtan kampaniyasına son qoyulması üçün hüquq-mühafizə orqanlarına müraciət olunacaq".

AzNews.az
Bağla X