Nazirlikdən xəbərdarlıq: endirimli mal alarkən diqqətli olun

İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən fiziki şəxs Süleymanova Aynur Mübariz qızına məxsus Bakı şəhəri, Nərimanov rayonu, Ağa Nemətulla küçəsi, ev 58 2E, mənzil 18 ünvanında fəaliyyət göstərən mağazada aparılan yoxlama zamanı qeyri-dəqiq reklamdan istifadə edilməklə istehlakçıların aldadılması halları müəyyənləşdirilib.

Nazirliyin mətbuat xidmətindən verilən məlumata görə, belə ki, mağazanın pəncərələrində "Qadın çanta və ayaqqabılarına 30%, 50% endirim" məzmunlu reklamlar yerləşdirilsə də, mağazada satışda olan malların qiymətinə endirim tətbiq edilmədiyi, malların üzərində endirimin tətbiqi barədə heç bir məlumatın (qiymətin) qeyd olunmadığı aşkar olunub.

Bundan başqa, qeyd olunan reklamların aidiyyəti strukturlardan icazə alınmadan yayımlandığı da müəyyən edilib. Bununla əlaqədar, Dövlət Xidməti tərəfindən görülmüş tədbirlər nəticəsində qanunsuz reklamların yayımı dayandırılıb.

Qanun pozuntusuna yol vermiş Aynur Süleymanova barəsində qanunvericiliyə uyğun olaraq müvafiq tədbirlər görülür.


AzNews.az