Sanksiyaların müddəti uzadıldı

Avropa Şurası Ukraynanın şərqindəki böhrana görə Rusiyanın 150 fiziki və 37 hüquqi şəxsinə qarşı sanksiyaların müddətini yarım il uzadıb.

ANS PRESS-in məlumatına görə, sanksiya siyahısına düşənləri Brüssel Ukraynanın ərazi bütövlüyünün pozulmasına görə məsuliyyət daşıdıqlarını sayır.

Ötən il qüvvəyə minmiş Rusiyaya qarşı Avropa sanksiyalarının müddəti martın 15-də bitməli idi.

Lakin bu ilin yanvarında Ukraynada vəziyyət kəskinləşdiyinə görə Brüssel sanksiyaları uzatmaq qərarına gəldi.

Avropa İttifaqının (Aİ) sanksiya siyahısına Rusiyanın bir neçə iş adamı, bir qrup Dövlət Dumasının deputatları və Federasiya Şurası üzvlərinin adı salınıb.

Fərdi sanksiyalar həmin şəxslərin Aİ ölkələrinə girişinə qadağa qoyulmasını və onların aktivlərinin dondurulmasını nəzərdə tutur.

Bundan əvvəl ABŞ Ukraynada vəziyyətlə bağlı Rusiyaya qarşı sanksiyaların daha 1 il müddətinə uzadılması qərarını qəbul etmişdi.