Azərbaycandakı hərbi attaşelər toplandı

Azərbaycanda akkreditə olunmuş xarici ölkələrin hərbi attaşeləri ilə toplantı keçirilib. Müdafiə Nazirliyinin mətbuat xidmətindən AzNews.az-a verilən məlumata görə, ABŞ, Rusiya, Türkiyə, Böyük Britaniya, Fransa, Almaniya, İtaliya, İspaniya, İran, Çin, Ukrayna, Qazaxıstan, Gürcüstan, Pakistan, Çexiya, Belarus, Bolqarıstan, Slovakiya, Latviya, Niderland, Polşa, Avstrya, Finlandiya, Macarıstan, Zambiya dövlətlərinin hərbi attaşeləri əvvəlcə Bakıdakı N saylı hərbi hissəyə gedərək sülhməramlı tabor haqqında keçirilən brifinqə qatılıblar. Sonra sülhməramlı taborun şəxsi heyəti ilə görüş keçirilib.

Silahlı Qüvvələrin Təlim və Tədris Mərkəzində hərbi diplomatlar sinif otaqları və mərkəzə aid başqa vasitələrə baxış keçiriblər. Sonda Silahlı Qüvvələrin SNT mərkəzində açılış brifinqi olub və müzakirələrə start verilib.

Brifinqi giriş sözü ilə açan Müdafiə Nazirliyi Beynəlxalq Hərbi Əməkdaşlıq İdarəsinin rəisi general-mayor Ramiz Nəcəfov Azərbaycanın müdafiə naziri general-polkovnik Səfər Əbiyevin adından qonaqları salamlayaraq çıxış üçün sözü müdafiə nazirinin müavini general-leytenant Çingiz Məmmədova verib. Nazir müavini regiondakı vəziyyət, beynəlxalq hərbi əməkdaşlıq məsələləri və Ermənistanın təcavüzkar siyasəti barədə qonaqları məlumatlandırıb.

Müdafiə Nazirliyinin Beynəlxalq Hərbi Əməkdaşlıq İdarəsinin zabitləri tərəfindən Azərbaycan Ordusunda son illər baş verən yeniliklər və gələcək planlar barədə qonaqlara məruzələr edilib.

Toplantının sonunda attaşeləri maraqlandıran suallara cavablar verilib.

AzNews.az