Ermənistan vəziyyəti gərginləşdirir – Azərbaycan XİN

“Azərbaycan və Ermənistan xarici işlər nazirlərinin Nyu-Yorkda BMT Baş Assambleyası çərçivəsində nəzərdə tutulan görüşü ərəfəsində Ermənistan rəhbərliyi tərəfindən Azərbaycanın işğal olunmuş ərazilərinə belə bir təxribatçı səfərin edilməsi və səfər zamanı aqressiv bəyanatların səsləndirilməsi Ermənistan tərəfinin qəsdən vəziyyəti gərginləşdirmək niyyətinin göstəricisidir”.

AzNews.az məlumatına görə, bu barədə Azərbaycan XİN-in mətbuat xidmətinin Ermənistanın baş naziri Nikol Paşinyanın sentyabrın 18-də qondarma “respublika”yə səfəri və oradakı bəyanatlarına şərhində bildirilib.

Qeyd olunub ki, Azərbaycan ATƏT-in Minsk Qrupunun həmsədrlərini işğalçı Ermənistanı danışıqlar prosesinə xələl yetirən bu kimi təxribatçı addımlardan və bəyanatlardan çəkindirmək istiqamətində addımlar atmağa çağırır.

“Ermənistan son günlər təmas xəttində, eləcə də Azərbaycan-Ermənistan sərhədində vəziyyətin gərginləşdirilməsi istiqamətində sistematik addımlar atır. Azərbaycan torpaqlarının işğalı, bu ərazilərdə törədilən çoxsaylı qanun pozuntuları və cəbhə bölgəsində yaranmış gərginliyin bütün məsuliyyəti Ermənistan rəhbərliyinin üzərinə düşür”, - deyə qeyd edilib.

Qeyd edək ki, Paşinyan “səfər” zamanı sülhə də, müharibəyə hazır olduqlarını bildirib.

AzNews.az