Qardaşının ölümünə dözmədi - Bulvarda özünü öldürmək istədi

5 May 2017 16:54 (UTC+04:00)

AzNews.az Fövqəladə Hallar Nazirliyinin Böhran Vəziyyətlərində İdarəetmə Mərkəzinə daxil olan məlumata əsasən Bakı şəhəri, Dənizkənarı Milli Park ərazisində 1 nəfər intihar məqsədi ilə özünü dənizə atıb və boğulmaq təhlükəsi ilə üzləşib. Dərhal Nazirliyin Kiçikhəcmli Gəmilərə Nəzarət və Sularda Xilasetmə Dövlət Xidmətinin xilasediciləri hadisə yerinə cəlb olunaraq vətəndaşı xilas edərək aidiyyəti üzrə təhvil veriblər. Əməliyyat saat 11:00-da başa çatıb.

Lent.az xəbər verir ki, saat 11 radələrində Neftçilər prospekti 133 ünvanının yaxınlığında - Dənizkənarı Milli Park ərazisindəki Saat Qülləsinin qarşısında özünü dənizə atan qadının 1998-ci il təvəllüdlü Şıxəliyeva Rəna Adil qızı olması müəyyən edilib. FHN-in xilasediciləri tərəfindən sudan çıxarılan qadın Kliniki Tibbi Mərkəzə yerləşdirilib.

İlkin araşdırmalar zamanı məlum olub ki, R.Şıxəliyevanın qardaşı bir neçə gün əvvəl vəfat edib. Bundan sonra o, dərin psixoloji sarsıntı keçirib. Bu səbəbdən də o, özünü bulvarda dənizə ataraq həyatına son qoymaq istəyib.

Araşdırma aparılır.