Eks xarici işlər naziri Bakıya gələcək

2 Aprel 2013 05:20 (UTC+04:00)
2006-2009-cu illərdə Yunanıstanın xarici işlər naziri olmuş və ölkə tarixində ən yüksək vəzifə tutmuş qadın olan Dora Bakoyannis bu il mayın 6-8-də Nizami Gəncəvi Beynəlxalq Mərkəzi və Madrid Klubunun təşkil etdiyi Cənubi Qafqaz Forumunda iştirak edəcək. D.Bakoyannis forumun münaqişələrlə bağlı plenar iclasına sədrlik edəcək.

1992-93-cü ildə Yunanıstanın mədəniyyət naziri, 2003-2006-cı illərdə Afina şəhərinin ilk qadın meri olan və Afina Yay Olimpiya Oyunlarına rəhbərlik edən Dora Bakoyannis hazırda Demokratik Alyans Partiyasının sədri olmaqla Parlamentdə də təmsil olunur.

O, 2009-cu ildə isə ATƏT-ə rəhbərlik edərək Dağlıq Qarabağ münaqişəsinin həll olunması üçün aktiv fəaliyyət göstərib.

Qeyd edək ki, D.Bakoyannis Nizami Gəncəvi Beynəlxalq Mərkəzinin İdarə Heyətində də təmsil olunur.

Xanım Bakoyannisi səfər zamanı Ümumdünya Olimpiya Akademiyasının prezidenti İsidoros Kouvelos müşayiət edəcək.

AzNews.az