İran prezidentinin müavini:“Aramızda şeytan var“

6 May 2013 08:44 (UTC+04:00)
"Mən qətiyyətlə deyirəm ki, anti-İran mövqedə olanlar Azərbaycan Respublikası prezident seçkisində səs toplaya bilməyəcəklər. Çünki Azərbaycan və İran xalqı ölkələrini sevir və dostdurlar. Özlərini İran ilə bərabər tuturlar. Bizimlə qonşu olan ölkə anti-İran ola bilməz. Seçkidə İran əks mövqedə olan qüvvələrin səs toplayacağına inanmıram".

Bu bəyanatı İran prezidentinin parlament və hüquq məsələləri üzrə müavini Məhəmmədrza Mir Tacəddini səsləndirib.


O bildirib ki, İran həmişə Azərbaycanla yaxşı əlaqə qurmaq istəyib: "Çünki, bizim müştərək cəhətlərimiz olduqca çoxdur. Dünyada heç bir iki ölkə yoxdur ki, bu qədər yaxınlıqları olsun. İki ölkə qonşudur. Mədəniyyət baxımından saya gəlməz müştərək cəhətlərimiz var. İranın bir neçə vilayəti azəridir. Yaxşı diqqət olunsa görərik ki, düşmənlər bu iki ölkə arasında yaxşı əlaqələri istəmirlər. Arada şeytan var. Bu şeytan kimdir? Bu şeytan Amerika və sionist rejimdir. Düşünürlər ki, İran ilə Azərbaycan Respublikası iki qonşu və qardaş ölkə bərabər olsalar, onda bir-birilərinin yüksəlməsinə kömək edəcəklər. Düşmənlər bunu istəmirlər".

Elnarə
AzNews.az