Azərbaycana ən çox narkotik daşınan ölkə- İRAN
30 Yanvar 2014 12:12 (UTC+04:00)
Qaçaqmalçılıq yolu ilə Azərbaycana narkotik maddələrin böyük əksəriyyəti İrandan gətirilir.
Trend-in məlumatına görə, bu barədə jurnalistlərə Azərbaycan Dövlət Gömrük Komitəsinin (DGK) sədri Aydın Əliyev 2013-cü ilin fəaliyyət yekunlarına və qarşıda duran vəzifələrə həsr edilmiş komitənin geniş kollegiya iclası ərəfəsində bildirib.
Onun sözlərinə görə, 2013-cü ildə gömrük orqanları tərəfindən Azərbaycana 135 kiloqramdan artıq narkotik maddənin keçirilməsinin qarşısı alınıb. Rusiyadan narkotiklərin gətirilməsi ilə bağlı bir neçə hadisə istisna olmaqla, yerdə qalan faktların hamısı İranla sərhəddə qeydə alınıb.
DGK sədri əlavə edib ki, diqqəti belə maddələrin qaçaqmalçılığının strukturuna yönəltmək lazımdır: "İlk dəfə qaçaqmalçılığın ümumi həcmində heroin yüksək xüsusi çəkiyə malikdir. Bu, diqqət yönəldilməsi lazım olan çox həyəcanlı faktdır. Uzun müddət biz ölkəyə kokain gətirilməsi cəhdləri ilə üzləşməmişik. Belə hallar 2013-cü ildə qeydə alınıb. Ən ciddi amil kimi bir çox sintetik maddələrin istehsalı üçün xammal rolunu oynayan metamfetaminlərin qaçaqmalçılığı, eləcə də tranzitini qeyd etmək lazımdır".
A.Əliyevin sözlərinə görə, bundan başqa, iri həcmdə mobil texnikanın və zərgərlik məmulatlarının qanunsuz daşınması cəhdlərinin qarşısı alınıb.
AzNews.az