Prezident: “Azərbaycan öz ərazi bütövlüyünü bərpa edəcək“- VİDEO

19 Mart 2014 15:28 (UTC+04:00)
"Azərbaycan öz ərazi bütövlüyü, öz suverenleyini bərpa edəcək". Bunu bu gün Bakıda keçirilən Novruz bayramı ilə bağlı tədbirdə iştirak edən və bayram tonqalını alovlandıran prezident İlham Əliyev deyib.

Dövlət başçısı azərbaycanlıların Dağlıq Qarabağa, digər işğal edilmiş torpaqlara və bütün tarixi torpaqlara qayıdacağını deyib. "Mən buna əminəm. Şübhə etmirəm. Buna nail olmaq üçün biz daha da güclü olmalıyıq".

Qeyd edək ki, Novruz tədbirləri İçərişəhərdə və Milli parkda təşkil edilib. Dövlət başçısını və xanımı Mehriban Əliyevanı Milli Parkda Novruz bayramının əsas personajları olan Kosa və Keçəl qarşılayıblar. Kosa və Keçəl prezidenti və xanımını bayram münasibətilə təbrik ediblər, dövlət başçısı ilə yumurta döyüşdürüblər. Daha sonra dövlət başçısı və xanımı bayram konsertinə baxıblar.

Milli Parkda təşkil edilən "Şərq bazarı" bayram şənliyinə qatılan prezident və xanımı burada ölkəmizin müxtəlif bölgələrini təmsil edən özfəaliyyət kollektivlərinin çıxışları və hazırlanmış sənətkarlıq nümunələrini izləyiblər. Dövlət başçısı və xanımı zorxana güləşçiləri ilə xatirə şəkli çəkdiriblər.

İ. Əliyev və xanımı manqalda bişirilən kababın dadına da baxıblar.

Novruz bayramı münasibətilə keçirilən şənliklərdə Baş nazir Artur Rasizadə, Milli Məclisin sədri Oqtay Əsədov, Prezident Administrasiyasının rəhbəri Ramiz Mehdiyev və digər rəsmi şəxslər iştirak ediblər.(anspress)