Doktorantura pilləsinə qəbulda dəyişiklik edildi

5 Mart 2015 13:48 (UTC+04:00)


AMEA Rəyasət Heyəti Aparatının İctimaiyyətlə əlaqələr və elmin populyarlaşdırılması idarəsinin İctimaiyyətlə əlaqələr şöbəsinin rəisi Baba Əliyev APA-ya açıqlamasında deyib ki, bu vaxta kimi olan qaydalara əsasən, doktoranturaya qəbul olmaq istəyənlər ixtisas fənnindən, xarici dildən və fəlsəfədən ali təhsil pilləsinin magistratura səviyyəsi üçün qüvvədə olan tədris proqramları həcmində qəbul imtahanları veriblər.

Bu ildən ediləcək dəyişikliyə əsasən isə doktoranturada təhsil almaq istəyənlərin ingilis dili fənni üzrə imtahanda iştirak etmək üçün beynəlxalq ingilis dili proqramları - TOEFL və IELTS proqramları üzrə sertifikatları olmalıdır. Bu sertifikat olmadığı halda onlar doktoranturaya qəbul imtahanlarında iştirak edə bilməyəcəklər.

AMEA-nın doktorluq imtahanları zamanı da TOEFL və IELTS proqramları üzrə sertifikat tələb olunacaq. Belə ki, AMEA-da doktoranturaya qəbul və doktorluq imtahanları zamanı xarici dil biliklərinin müasir səviyyədə qiymətləndirilməsi üçün qaydalar müəyyən edilib. Tələbləri yüksəltmək məqsədilə namizədlərin ingilis dili biliklərinin qiymətləndirilməsi üçün doktoranturaya qəbul zamanı iddiaçı TOEFL proqramı üzrə ən azı 80 bal və ya IELTS proqramı üzrə ən azı 6.5 bal, doktorluq imtahanları zamanı isə iddiaçı TOEFL proqramı üzrə ən azı 100 bal və ya IELTS proqramı üzrə ən azı 7 bal toplaması barədə sertifikat təqdim etməlidir.

Qeyd edək ki, AMEA Rəyasət Heyətinin iclasında fəlsəfə doktoru hazırlığı üzrə xarici dil biliklərinin keyfiyyətinin yüksəldilməsinə dair tədbirlər haqqında qərar qəbul olunub. Doktoranturaya qəbul və doktorluq imtahanları qaydalarına dəyişiklik bu qərara əsasən həyata keçiriləcək.