Prezidentin yanğınla bağlı yaratdığı Komissiyanın- İLK İCLASI

19 May 2015 23:47 (UTC+04:00)


AzNews.az Azərtac-a istinadən xəbər verir ki, bu barədə Baş nazirin müavini, Dövlət Komissiyasının sədri Abid Şərifov məlumat verib:

"Son məlumatlara əsasən, hadisə zamanı 14 nəfər dünyasını dəyişib. Onlardan səkkizi qadın, altısı kişi, o cümlədən beşi uşaqdır. Ambulatoriyalara və xəstəxanalara müraciət edənlərin sayı 51 nəfər olub. Onlardan 19 nəfəri hələlik xəstəxanalardadır. Həmin 19 nəfərdən 18-nin vəziyyəti normal, birinin vəziyyəti isə orta ağırdır. Səhiyyə Nazirliyinə tapşırılıb ki, xəsarət alanların müalicəsi məsələsinə ciddi nəzarət olunsun".

Onun sözlərinə görə, prezidentin tapşırığına əsasən birinci növbədə binanın sakinlərinin yerləşdirilməsinə başlanılıb:

"Orada xüsusi qərargah işləyir. Biz birinci növbədə sakinləri yerləşdirmək üçün dövlət obyektlərini müəyyənləşdirdik. Komissiyanın ilk iclasında artıq 56 mənzil müəyyənləşdirilib və nəqliyyat da ayrılıb. Evləri bərpa olunana qədər həmin mənzillərdə onların bütün yaşayış şəraiti dövlət hesabına təmin olunacaq. Bizim müəyyənləşdirdiyimiz mənzillərə köçmək istəməyənlərə vəsait veriləcək ki, kirayədə qalsınlar".

Prezidentin göstərişinə əsasən, dünyasını dəyişənlərin bütün dəfn xərcləri dövlət tərəfindən ödəniləcək:

"Artıq bu barədə Bakı Şəhər İcra Hakimiyyətinə, Binəqədi Rayon İcra Hakimiyyətinə və Maliyyə Nazirliyinə tapşırıq verilib. Bundan əlavə, xəstəxanalarda müalicə alanlara da yardım göstəriləcək. Komissiya sabahdan etibarən binanın mənzillərində yanmış əmlakın dəyərini müəyyənləşdirəcək və kompensasiya ödəniləcək.

Artıq hadisə ilə bağlı cinayət işi açılıb. Günahkarlar ciddi cəzalandırılacaq. Əlbəttə ilk növbədə bizim vəzifəmiz insanların yerləşdirilməsi, onlara lazımi köməyin göstərilməsidir. Bu istiqamətdə ciddi iş aparılır".