Azərbaycan Beynəlxalq Konfransa keçiriləcək

Azərbaycan Beynəlxalq Konfransa ev sahibliyi edəcək.

AzNews.az-a Hava və Ekstremal İdman Növləri Federasiyasının (FAİREX) mətbuat xidmətindən daxil olan məlumata görə, tədbir oktyabrın 24-25-də keçiriləcək. Dağçılıq və Dırmanma üzrə Beynəlxalq Federasiyasının (UIAA) təşəbbüsü ilə keçiriləcək konfransın əsas təşkilatçıları IDEA Kampaniyası, Qərb Universiteti, Azərbaycan Dağçılıq və Ekstremal İdman Növləri Federasiyaları Assosiasiyasıdır.

Bakıda gerçəkləşəcək beynəlxalq tədbirin mövzusu dünyanın dağlıq regionlarında turizmin davamlı inkişafı üçün dağ idman növlərinin Qafqaz nümunəsində roluna həsr olunub. Konfrans Dağçılıq və Dırmanma üzrə Beynəlxalq Federasiyanın "Dağların Mühafizəsi Mükafatı" ("Mountain Protection Award") proqramı çərçivəsində təşkil olunur və bu mükafat dağ turizminin inkişafı üçün dağ ətraf mühitinin mühafizəsi üzrə konkret tədbirlərə görə verilir. Sözügedən mükafat proqramında şirkətlərin, fiziki şəxslərin, müxtəlif assosiasiya və bələdiyyələrin iştirakı mümkündür. Qeyd edək ki, bu proqram ictimai maarifləndirmə, dağçılıq idman növlərinin təbliği, ekoturizmin inkişaf etdirilməsi və dağ ətraf mühitinin birgə mühafizəsi kimi konkret məqsədlərin həyata keçirilməsini qarşıya qoyur.

Qeyd edək ki, bu beynəlxalq səviyyəli prosesə Azərbaycandan ilk dəfə Qərb Universiteti qoşulub və həmin proqram çərçivəsində UİAA-nın "Dağların Mühafizəsi Mükafatı" proqramına maliyyə dəstəyi göstərib. Bu uğurlu əməkdaşlıq 4-5 oktyabr 2013-cü il tarixlərində İsveçrədə keçirilən UİAA-nın Baş Assambleyasının iclasında və UİAA-nın illik hesabatında xüsusilə qeyd olunub.

Bakıda keçiriləcək konfransda dağ turizminin inkişaf etdirilməsi üçün səmərəli marketinq proqramlarının hazırlanması, dağ ərazilərinin davamlı inkişafının təmin olunmasında elmi dairələrin iştirakı, dağların mühafizəsi üzrə səmərəli təcrübənin və siyasətin nəzərdən keçirilməsi, həmçinin elmi proqramlar vasitəsilə dağçı turistlərin dağların mühafizəsi monitorinqində fəal iştirakının təmin edilməsi kimi məsələlərin müzakirəsi nəzərdə tutulur.

Bilavasitə UİAA-nın təşəbbüsü və intellektual dəstəyi ilə həyata keçiriləcək konfransda nüfuzlu beynəlxalq mütəxəssislər, o cümlədən UİAA-nın vitse-prezidenti Piter Farkaş, UİAA-nın Dağların Mühafizəsi üzrə Komissiyasının Prezidenti xanım Linda Makmillan, UİAA-nın katibi Sofi Gerard, Geologiya üzrə beynəlxalq ekspert Ronald Gallaher, eyni zamanda yerli dövlət qurumlarının, elmi tədqiqat idarələrinin, tədris müəssislərinin, vətəndaş cəmiyyətinin nümayəndələri, alimlər mövzularla bağlı çıxış edəcəklər.

AzNews.az