Bu haqda məlumatı Prezidentin mətbuat xidməti yayıb Bu haqda məlumatı Prezidentin mətbuat xidməti yayıb
  • Paytaxt
  • 25 May 2019 14:06
  •  2 037

İlham Əliyev Gürcüstan Prezidentini təbrik etdi

Bu haqda məlumatı Prezidentin mətbuat xidməti yayıb

Azərbaycan Respublikasının Prezidenti İlham Əliyev Gürcüstan Prezidenti Salome Zurabişviliyə təbrik məktubu göndərib.

Məktubda deyilir:

"Hörmətli xanım Prezident,

Gürcüstanın milli bayramı – Müstəqillik Günü münasibətilə Sizi və bütün xalqınızı şəxsən öz adımdan və Azərbaycan xalqı adından səmimi qəlbdən təbrik edirəm.

Azərbaycan ilə Gürcüstan arasındakı münasibətlər tarixən dostluq və mehriban qonşuluq şəraitində yaşamış xalqlarımızın iradəsindən qaynaqlanır. Belə möhkəm təməllərə əsaslanan dövlətlərarası münasibətlərimizin yüksək səviyyəsi məmnunluq doğurur.

İnanıram ki, ikitərəfli və çoxtərəfli qaydada əməkdaşlığımız, qarşılıqlı etimad və dəstəyə əsaslanan strateji tərəfdaşlığımız xalqlarımızın mənafelərinə uyğun olaraq bundan sonra da inkişaf edəcək və genişlənəcəkdir.

Bu əlamətdar gündə Sizə möhkəm cansağlığı, işlərinizdə uğurlar, dost Gürcüstan xalqına əmin-amanlıq və firavanlıq arzulayıram".