Azərbaycanda görünməmiş rüsvayçılıq - Yenilənib

Qadın paltarları mağazasının soyunma otağında GİZLİ KAMERA



SABİRABAD SAKİNLƏRİ AYAĞA QALXDI, SAHİBKAR DAŞ-QALAQ EDİLDİ, HƏBSLƏR GÖZLƏNİLİR

15:03
Sabirabadda sakinlərin qəzəbinə səbəb olan rüsvayçı bir faktın üstü açılıb. Belə ki, şəhərin mərkəzində yerləşən "KRAL" geyim mağazasının soyunub-geyinmə otağında gizli kameranın yerləşdirildiyi üzə çıxıb.

AZNEWS.AZ-a daxil olan xəbərə görə, hadisə qadın geyimlərinin satışıyla məşğul olan "KRAL" mağazasında baş verib. Maraqlıdır ki, həmin mağazanın sahibi də xanımdır. Görəsən, sahibi qadın olan qadın geyimləri mağazasında qadınları niyə izləsinlər ki?

Əldə etdiyimiz məlumatda Hacı Arifə kimi tanınan sahibkar xanımın qəribə keçmişi var. Lakin qadınların izlənmə həvəsinin onun nə keçmişi, nə də indisi ilə əlaqəsi var. Belə ki, bu oyun qadının övladı Hüseynin başının altından çıxıb. Qudurğan olduğu söylənən 19 yaşlı gənc soyunub-geyinmə otağına kamera qurub qızları pusurmuş...

Məlumata görə, mağazada çalışan qızlardan biri bundan duyuq düşsə də, işin üstünü xadimə açıb. Kameranı otaqda görən xadimə bu haqda mağazadan alış-veriş etmək istəyən bir qızın nişanlısına deyib. Qızın nişanlısı məsələni araşdırıb və Hüseyn iş başında yaxalanıb. Hüseynin əzişdirilməsi ilə başlayan olay sonradan bir az da böyüyüb. Hadisə rayon camaatının narazılığına səbəb olub və onlar Arifənin evinə hücum edib. Hacıxanımı da döyən yerli əhalinin məsələ ilə bağlı narahatlığının davam etdiyi bildirilir. Rayonda Arifənin öldürülməsi ilə bağlı şayiə də yayılıb.

Faktla bağlı Sabirabad rayon Polis Şöbəsində araşdırma aparılır. Polis şöbəsinin təhqiqatçısı Möhlət Bayramov AZNEWS.AZ-a açıqlamasında bildirib ki, faktla bağlı araşdırmaya sahibkarın müraciəti əsasında başlanıb:

"Polisə sahibkar özü müraciət edib. O, rayonda onun mağazasının geyinmə otağına kamera yerləşdirilməsi ilə bağlı şayiələr dolaşdığından belə bir addım atdığını bildirib. Sahibkar müraciətini də bu söz-söhbətin onun işgüzar nüfuzuna xələl gətirə biləcəyi ilə əsaslandırıb. Biz aşkarladıq ki, obyektdə 16 kamera var. Lakin geyinmə otağında hər hansı kamera aşkarlanmayıb. Kameraların son 15 günlük yaddaşını şəxsən yoxlamışam. Deyilənlərlə bağlı hər hansı görüntüyə rast gəlməmişəm"
Sakinlər isə polisin yalan danışdığını, "hörmət" müqabilində sakitlik yaratmaq istədiklərini bildiriblər. Onların sözlərinə görə, kamera həmin otaqdan məsələnin üstü açılandan sonra götürülüb.

***

18:36
Bu dəqiqələrdə mağaza sahibəsi Hacı Arifə Dərgahova redaksiyamızla əlaqə saxlayaraq, məsələ ilə bağlı münasibətini bildirib. Onun sözlərinə görə, onun haqqında yayılan xəbərlərin heç bir əsası yoxdur: "Mən hacı adamam, oğlum da hacıdır, həyat yoldaşım da, atam da. Amma görünür, bu şayiələri yayanların nə Allahdan, nə dindən xəbəri var. Mən sahibkaram, 40 yoxsul adama baxıram. Bu deyilənlərin hamısı iftiradır. Kimsə mənim biznesimə xələl gətirmək, öz nüfuzumu isə azaltmaq istəyir. Əmin olun ki, elə bir hadisə olmayıb. Rayonda bəzi qüvvələr bu şayiəni yayıblar. Mən də oğluma kiminsə xətər yetirməsindən ehtiyatlanaraq, polisə müraciət etmişəm". Sahibkarın sözlərinə görə məsələ ilə bağlı onun bütün işçilərinin izahatları alınıb: "Mənim müraciətimdən sonra polis mağazaya baxış keçirib və bütün işçilərimin izahatı alınıb. Mən bu xəbərləri yayanları tapacağam, onları məhkəməyə verəcəyəm. Mən sahibkaram, məni kimi adamları dövlət qoruyur, mənim haqqımda belə informasiyaları yaymaq dövlətə qarşı çıxmaqdır".

Ruhiyyə
AzNews.az