“Ermənistan saxtakarlıq siyasətini davam etdirir“

"Ermənistan Azərbaycanın işğal olunmuş ərazilərində öz hərbi mövcudiyyətini gücləndirməyə davam edir".

APA-nın xəbərinə görə, bunu Azərbaycanın BMT-dəki daimi nümayəndəsinin müavini Tofiq Musayev Ermənistan xarici işlər nazirinin BMT Baş Assambleyasının 68-ci sessiyasının ümumi müzakirələrindəki çıxışına cavab olaraq yaydığı bəyanatda bildirib.

Bəyanatda deyilir ki, Ermənistan təcavüzkarlıq, düşmənçilik, nifrət, yalan və saxtakarlıq siyasətini davam etdirir: "Ermənistan xarici işlər nazirinin sözlərinə görə, onun hökuməti ATƏT-in Minsk Qrupunun həmsədr ölkələrinin dövlət başçılarının 18 iyun 2013-cü il tarixli bəyanatını alqışlayır. Lakin alqış münaqişənin həllində irəliləyişə nail olmaq üçün kifayət deyil. Əslində Ermənistan Dağlıq Qarabağı və digər Azərbaycan rayonlarını işğal edib, bu əraziləri nəzarətdə saxlamaqla beynəlxalq hüququn prinsiplərini pozur. Ermənistan diplomatiyasının rəhbəri o qədər şövqə gəlib ki, hətta Azərbaycanı təcavüzdə ittiham edib. Belə məsuliyyətsiz fikirlər yalandan başqa bir şey deyil. Əks halda o deməli idi ki, Təhlükəsizlik Şurası qəbul etdiyi 4 qətnamədə nəinki Azərbaycanın "təcavüzünə" işarə vurmayıb, əksinə, Azərbaycana qarşı güc tətbiqini və onun ərazilərinin işğalını pisləyib".

Tərəflər arasında etimadın möhkəmləndirilməsi tədbirlərinə toxunan T. Musayev xatırladıb ki, Ermənistan təxminən 1 milyon azərbaycanlı qaçqın və məcburi köçkünün hüquqlarını şüurlu şəkildə inkar etməyə davam edir, işğal altındakı ərazilərdə demoqrafik vəziyyəti dəyişməyə və Azərbaycana aid tarixi-mədəni izləri silməyə səy göstərir: "Ermənistanın etimad tədbirləri mövzusunda spekulyasiyaları çox maraqlıdır, çünki bu ölkə Dağlıq Qarabağın iki icması arasında birbaşa təmasların əleyhinə çıxır. Bundan başqa, Azərbaycana və digər qonşu xalqlara münasibətdə etnik-dini baxımdan birgəyaşayışın mümkün olmadığı haqda öz odioz ideyasını gizlətməyən Ermənistan rəhbərliyinin bu siyasəti çətin ki, etimadın möhkəmlənməsinə şərait yaratsın".

T. Musayevin sözlərinə görə, atəşkəsin müntəzəm pozulması və Ermənistan ordusu tərəfindən dinc azərbaycanlı sakinlərin və mülki obyektlərin hədəf alınması son vaxtlar daha tez-tez baş verir və cəbhə xətti yaxınlığında yaşayanların ölümünə və yaralanmasına səbəb olur.

Azərbaycanlı diplomat sonda qeyd edib ki, BMT Təhlükəsizlik Şurasının qətnamələrini inkar edən, ATƏT-in himayəsi ilə sülhün təmin olunmasına yönəlmiş səylərə saymazyana yanaşan, Azərbaycan ərazilərinin işğalını davam etdirən, azərbaycanlı qaçqın və məcburi köçkünləri insan hüquqlarından məhrum edən, beynəlxalq hüququn norma və prinsiplərini təhrif edən Ermənistan regional və beynəlxalq sülhə və təhlükəsizliyə əslində kimin təhlükə törətdiyini aydın şəkildə nümayiş etdirir.


AzNews.az