Pakistan mediası Mehriban Əliyeva haqda yazdı

2014-cü ilin 6-7 oktyabr tarixlərində Pakistanın Xayber Paxtunxva əyalətinin qaçqınların məskunlaşdığı Lakki Marvat və Dera İsmail Xan bölgələrində, həmçinin sel daşqınlarından zərər çəkmiş Pəncab əyalətinin Okara, Multan, Ravalpindi və İslamabada şəhərlərində Azərbaycan Respublikasının Birinci xanımı, Heydər Əliyev Fondunun Prezidenti, UNESCO və İSESCO-nun xoşməramlı səfiri, millət vəkili Mehriban Əliyevanın dəstəyi ilə Qurban bayramı ilə əlaqədar keçirilmiş silsilə tədbirlər Pakistan elektron mediasında geniş işıqlandırılıb.

AzNews.az xəbər verir ki, Pakistanın "Jhang", "The News", "Express Preshawar" qəzetləri, "Diplomatik Star", "Centreline" jurnalları, "DNA news", "Pakistan in the World" informasiya agentlikləri tərəfindən tədbir haqqında məqalələr dərc olunub.

Məqalələrdə bildirilib ki, bölgələrdə təşkil olunan mərasimlərdə Pakistanın tanınmış siyasətçisi, Pakistanın sabiq neft naziri və sabiq ticarət naziri, senator Səlim Seyfulla Xan, Pakistan Parlamentinin sabiq sədr müavini, Pakistan-Azərbaycan dostluq qrupunun üzvü Feysəl Kərim Kundi, Bayt-ul-Malın təşkilatının icraçı direktoru Vahid Şeyx və administrasiyanın rəhbəri Cahangir Axtar, digər tanınmış şəxslər çıxış edərək Azərbaycanın birinci xanımı Mehriban Əliyevaya hər bir müsəlman üçün xüsusi önəm kəsb edən bayram günündə çətin maddi və mənəvi durumda olan məcburi köçkünlərin dərdinə şərik olmasına görə minnətdarlığını bildiriblər.

Məqalələrdə Ravalpindi şəhərində təşkil olunmuş mərasimdə Azərbaycan Respublikasının Pakistan İslam Respublikasındakı səfiri Daşqın Şikarovun tədbir iştirakçıları qarşısında çıxış edərək onları bayram münasibəti ilə təbrik etdiyi qeyd olunub.