Cəlilabad və Astaradan gələn aksiya xəbərlərinə - Rəsmi reaksiya

Bu gün Əmək və Əhalinin Sosial Müdafiə Nazirliyinin (ƏƏSMN) Cəlilabad rayon şöbəsində vətəndaşların ünvanlı sosial yardım almaları məqsədilə fərdi qaydada ərizələrinin qəbulu keçirilib.




AzNews.az APA-ya istinadən xəbər verir ki, qəbulda rayonun 35 ərazi vahidliyindən sakinlər iştirak edib. Nəticədə sıxlıq yaranıb, bəzi vətəndaşlar qəbulun gedişindən narazı qalıblar. Bununla yanaşı, sakinlər süni bahalaşmağa etiraz edib, banklara olan kredit borclarını ödəyə bilməmələrindən də şikayət ediblər.

Cəlilabad Rayon İcra Hakimiyyətindən (RİH) APA-nın cənub bürosuna bildirilib ki, ƏƏSMN-nin rayon şöbəsində sakinlərdən ərizələrin qəbulu elektron qaydada keçirilməli olduğu halda, hazırlıq işlərinin başa çatdırılmaması səbəbindən bu iş baş tutmayıb. Ona görə də rayonun 35 ərazi vahidliyindən vətəndaşların eyni gündə şöbəyə müraciət etməsi problem yaradıb.

O da bildirilib ki, RİH rəhbərliyi demək olar ki, hər gün vətəndaşların qəbulu və onların problemlərinin həlli ilə məşğuldur: "Elə sözügedən məsələ ilə də bağlı rayon rəhbərliyi əhali ilə görüşərək onların narahatlığına heç bir əsasın olmadığını, müraciətlərinin araşdırılacağını və müvafiq tədbirlərin görüləcəyini bildirib".

"Astara rayonunda tam sabitlik hökm sürür, heç bir aksiya keçirilməyib. Camaat öz cari iş-gücü ilə məşğuldur". Bunu isə APA-nın cənub bürosuna Astara Rayon İcra Hakimiyyəti (RİH) başçısının birinci müavini Allahverən Mahmudov deyib.

Onun sözlərinə görə, rayonun Şahağacı kəndində baş vermiş hadisə bank fırıldaqçılığı ilə bağlı olub: "Altı ay öncə həmin kəndin sakinləri Ceyhun Əhədov və Nahid Rəhimov "Republika Bank"ın Astara filialının işçisi Vüqar Yusifovla birləşərək öz həmyerlilərinin etibarından sui-istifadə etməklə 30-a yaxın şəxsin adından kredit götürüb mənimsəyiblər. Sonradan sakinlərin şikayətləri əsasında həmin şəxslər barəsində cinayət işi açılıb, C. Əhədovla N. Rəhimov həbs olunub. V. Yusifov isə respublikadan qaçıb".

A. Mahmudovun sözlərinə görə, bu məsələ ilə bağlı bu gün Baş Prokuror yanında Korrupsiyaya Qarşı Mübarizə Baş İdarəsinin müstəntiqi Şahağacı kəndinə gəlib: "Hazırda müstəntiq ərazi icra vahidliyinin binasında adlarına kredit götürülmüş şəxsləri qəbul edir, izahatlarını alır".


***

Bütün baş verənlərlə bağlı hakimiyyətdəki mənbədən APA-ya verilən məlumata görə, yayılan xəbərlər hamısı dezinformasiyadır: "Bir müddət əvvəl Azərbaycanın müxtəlif bölgələrində etiraz aksiyaları təşkil etmək cəhdləri iflasa uğradığı üçün hazırda bəzi qüvvələr daxili ictimai-siyasi vəziyyəti gərginləşdirmək üçün müxtəlif dezinformasiyalar yayırlar".

Bildirilib ki, şəxsi məsələləri ilə bağlı müxtəlif dövlət orqanlarının bölgələrdəki bölmələrinə gedən, yaxud yerli icra nümayəndəliklərində hesabat iclaslarında iştirak edən vətəndaşların toplu halında şəkillərinin etiraz aksiyası adı altında təqdim olunması ilə bağlı araşdırmalar başlayıb: "Bəzi hallarda isə köhnə şəkillər guya hazırda keçirilən etiraz aksiyaları kimi qələmə verilir".

Mənbə bildirib ki, kütləvi informasiya vasitələri və vətəndaşlar bu tipli şayiələrə uymamalıdır: "Həmçinin təxribatçı fəaliyyət jurnalist etikasına tamamilə zidd olmaqla yanaşı, həm də hüquqi məsuliyyət doğurur. Belə yalan və təxribat xarakterli məlumatlar yayanlara qarşı qanuna uyğun şəkildə ölçü götürüləcək".

Xatırladaq ki, bu gün Azərbaycanın sosial şəbəkələrdə və bəzi saytlarda Astara və Cəlilabad rayonlarında etiraz aksiyalarının keçirilməsi barədə xəbərlər yayılıb.