Seyid Yəhya Bakuvi yad ediləcək - Türkiyə

"Qafqazdan Anadoluya Mədəniyyət Körpülərimiz" beynəlxalq Seyid Yəhya Bakuvi və Xəlvətilik simpoziumu keçiriləcək.

Azərbaycan Qafqaz Universitetinin mətbuat xidmətindən AzNews.az-a verilən məlumata görə, tədbir Bakuvinin 550-ci ildönümü münasibəti ilə Ərdahan Universitetinin başçılıq etdiyi Kafkasya Universitelər Birliyi və Azərbaycan Qafqaz Universitetinin birgə təşkilatçılığı ilə reallaşacaq.

Simpoziumda Türkiyədən, ABŞ-dan, Azərbaycan, Qırğızıstan və digər ölkələrdən təsəvvüf, ədəbiyyat, tarix sahələrində çalışan elm xadimləri iştirak edəcək.

Təbdir noyabrın 21-22-də Türkiyədə Əskişəhərdə, noyabrın 24-25-də isə Bakıda baş tutacaq.

Əskişəhərdə keçirilən tədbirdə Azərbaycan Dini Qurumlarla İş üzrə Dövlət Komitəsi tərəfindən "Azərbaycan İslam incisi" fotoşəkil sərgisi də keçiriləcək.

Qeyd edək ki, 2013-cü il Seyid Yəhya Bakuvi vəfatının 550-ci ildönümü münasibətilə UNESCO tərəfindən Bakuvi Şirvani ili elan edilib.

AzNews.az