"Daha böyük uğurlara imza atacağıq"

"İnanıram və əminəm ki, gələcəkdə daha böyük uğurlara imza atacağıq"

"Dünya İqtisadi Forumunun hesabatına müdaxilə imkanları sıfıra bərabərdir. Bu hesabatda açıqlanan rəqəmlərin hamısı dəqiqdir. Çünki bütün məlumatları onların özləri əldə edirlər. Bu mənada hesabatda göstərilən bütün rəqəmlər Azərbaycan iqtisadiyyatını olduğu kimi əks etdirir".

Bu sözləri Dünya İqtisadi Forumunun Qlobal Rəqabətlilik Hesabatında Azərbaycanın dünyada sosial bərabərliyin ən yüksək səviyyədə təmin olunduğu ölkə kimi vurğulanmasına münasibət bildirərkən Milli Məclisin Büdcəyə nəzarət daimi komissiyasının sabiq sədri, sabiq Kənd təsərrüfatı və ərzaq nazirinin müavini, politoloq Cümşüd Nuriyev deyib.

Onun sözlərinə görə, həqiqətən də Azərbaycanda sosial bərabərliyin təmin olunması məsələsi üstünlük təşkil edir:

"Konstitutsiyamızın 15-ci maddəsinin 2-ci bəndinə görə, dövlət Azərbaycan vətəndaşlarının sosial rifah halını yaxşılaşdırılmasını öhdəlik kimi götürüb və bu öhdəliyi də layiqincə yerinə yetirir. Baxın, bu müstəqillik aktının qəbul olunması ərəfəsində bu, Azərbaycan üçün çox xoş bir xəbər oldu. Qısa bir müstəqillik tarixi olan dövlət iqitisadi göstəriclərinə görə, dünyada özünü göstərməyə başlayıb. Bu, əslində Prezident İlham Əliyevin son 15 ildə apardığı uğurlu , uzaqgörən daxili və xarici siyasətinin nəticəsidir. Prezidentin qazandığı uğur da təbii ki, dövlətin adı ilə bağlıdır. Azərbaycan digər göstəricilərə görə də, kifayət qədər müsbət irəliləyişlər var. Həm də bərabərlik təkcə iqtisadi kateqoriya kimi deyil, sosial kateqoriya kimi də özünü göstəırir. Bu onunla izah olunur ki, Azərbaycan tolerant ölkədir. Biz başqa xalqlara da eyni yanaşırıq. Bunlar Azərbaycanın təkcə iqtisadi deyil, həm də mədəni nailiyyətidir".

C.Nuriyev onu da əlavə edib ki, Azərbaycanda cənab Prezidentin göstərişi ilə iqtisadi yol xəritəsi qəbul olunub:

"O yol xəritələrinin icrasına başlanandan sonra Azərbaycan iqtisadiyyatı, ölkəmizdə xalqın sosial şəraiti, həyat səviyyəsi, dolanışığı yüksələn xətt üzrə inkişaf etdi. Azərbaycanda bir çox sosial proqramlar icra olunur. Şübhəsiz ki, Prezidentin 15 illik fəaliyyətinin nəticəsi belə olmalı idi və nə xoş oldu ki, bu hesabat müstəqillik günü ərəfəsinə təsadüf etdi. Prezidetə də təşəkkür edirəm ki, Ümumilli lider tərəfindən hazırlanan bazisin üzərində möhkəm bir iqtisad qurdu. İnanıram və əminəm ki, gələcəkdə daha böyük uğurlara imza atacağıq".

Qeyd edək ki, Dünya İqtisadi Forumunun Qlobal Rəqabətlilik Hesabatının 12 əsas sütun indikatorundan 7-si üzrə Azərbaycanın mövqeləri əhəmiyyətli dərəcədə yaxşılaşıb. Belə ki, hesabatın İnstitutlar, İnfrastruktur, İKT-nin istifadə səviyyəsi, Səhiyyə, Əmək bazarı, Biznes dinamikliyi və İnnovasiya potensialı sütun indikatorları üzrə Azərbaycanın mövqelərinin yaxşılaşması Qlobal Rəqabətlilik Hesabatı tərəfindən qeydə alınıb. Azərbaycan ətraf mühitə təsir və inklüziv inkişaf indikatorları üzrə yeni nəsil metodologiya əsasında hazırlanmış hesabatda lider mövqelərini qoruyub. Azərbaycan dünyanın 140 ölkəsi arasında biznesin dinamikliyi reytinqi üzrə 31-ci yerdə qərarlaşıb. Belə yüksək nəticənin əldə olunması son illər Prezident İlham Əliyev tərəfindən aparılan iqtisadi islahatların nəticəsində mümkün olub. (sherg.az)

© AzNews.az