Əməkdaşımız bu suala cavab almaq üçün fakültənin dekanı Şəkər Məmmədovaya zəng etdi Əməkdaşımız bu suala cavab almaq üçün fakültənin dekanı Şəkər Məmmədovaya zəng etdi
  • Toplum
  • 15 Noyabr 2018 17:17
  •  12 468

Abel Məhərrəmovun son iclası - Keçmiş rektor Coğrafiya fakültəsində nədən danışıb?

Əməkdaşımız bu suala cavab almaq üçün fakültənin dekanı Şəkər Məmmədovaya zəng etdi

Bu gün Azərbaycan prezidenti İlham Əliyev Bakı Dövlət Universitetinin rektoru Abel Məhərrəmovu vəzifəsindən azad edib.

Dövlət başçısının sərəncamı prezidentin rəsmi saytında saat 15.50 dəqiqədə yayılıb.

Bundan bir neçə saat öncə isə “Yeni Müsavat” qəzetinin internet versiyasında Abel Məhərrəmovun vəzifəsindən azad ediləcəyi barədə sensasiyalı yazı verilib. Həmin yazıda BDU rektorunun dövlət başçısının, yumşaq desək, nəzərindən düşməsinin səbəbləri barədə ciddi iddialar irəli sürülüb. “Abel Məhərrəmov özünü necə yandırdı - prezident rektoru bu səbəbdən qovdu?” başlıqlı məqalədə vurğulanır:

“Noyabrın 3-də Qafqaz Müsəlmanları İdarəsinin sədri şeyxülislam Allahşükür Paşazadə başda olmaqla geniş tərkibli Azərbaycan nümayəndə heyəti xüsusi reyslə İspaniyanın paytaxtı Madrid şəhərinə yola düşüb. Musavat.com -a verilən məlumata görə, məqsəd bu ölkədə dini tolerantlıq mövzusunda keçiriləcək beynəlxalq konfransda iştirak etmək olub. Nümayəndə heyətinin tərkibində olan və adının çəkilməsini istəməyən şəxslərdən birinin verdiyi məlumata görə, səfər başlanğıcdan sona qədər "maraqlı macəralar”la zəngin olub.

Əvvəlcə, Airbus-319A təyyarəsi ilə uçmağa hazırlaşan nümayəndə heyəti öz yerini tutduqdan sonra təyyarə 2 saata qədər havaya qalxa bilməyib. Buna səbəb isə sərnişinlərdən birinin - nümayəndə heyətinin tərkibində yer alan BDU-nun rektoru, akademik Abel Məhərrəmovun 2 tonluq baqajı olub. Səfər iştirakçıları noyabrın 10-da Madriddən qayıdanda da eyni hadisə ilə üzləşməyə məcbur olublar. Yalnız A.Məhərrrəmova və onun ölkəmizin İspaniya Krallığındakı səfir işləyən oğluna məxsus 2 tona qədər yük boşaldıldıqdan sonra təyyarənin uçuşuna icazə verilib”

Sözügedən yazıda daha sonra deyilir:

“Sual oluna bilər ki, bir nəfər bu qədər yüklə niyə səfərə çıxır. Mənbəmizin məlumatına görə, haqqında danışdığımız yük adi yol çemodanları yox, hörmətli akademikin və onun səfir oğlunun şərab biznesinə aid çəlləklər imiş. Sən demə, şərab dolu çəlləklər kontrabanda yolu ilə Azərbaycandan İspaniyaya aparılır və orada şüşələrə doldurularaq qeyri-qanuni şəkildə geri qaytarılır. Sonra isə ispan şərabı adı ilə A.Məhərrəmova məxsus şadlıq evlərində, restoranlarda və digər ticarət nöqtələrində satılır”.

Sayt daha sonra əlavə edir ki, A. Məhərrəmovu "yandıran” səbəb onun diribaş biznesmen olması, hörmətli şeyxin təyyarəsini özünün yükdaşıma nəqliyyat vasitəsi hesab etməsi yox, Madridin "Eurostar Madrid” otelinin restoranında adını çəkmək istəmədiyimiz millət vəkillərindən biri ilə yeyib-içdiyi vaxt saldığı dava-dalaşdır: “Əldə etdiyimiz məlumata görə, gətirdiyi şərablardan və cürbəcür ispan içkilərindən qəbul etdikdən sonra hörmətli akademik bəziləri ilə "haqq-hesab çürütmək” fikrinə düşüb. "Haqq-hesab” o qədər səs-küylü və aqressiv olub ki, nəinki restoran və oteldəkilər, hətta ətraf məhəllələrdə yaşayan sakinlər də narahat olublar. Yalnız ispan polisi işə qarışdıqdan sonra dava-dalaş dayanıb və bardakı hörmətli həmvətənlərimiz dağılışıblar.

Bəs A.Məhərrəmovu özündən çıxaran o məşum səbəb nə imiş? Deyilənə görə, Azərbaycanın İspaniyadakı səfiri, hörmətli akademikin oğlu Anar Məhərrəmovla şeyxin qudası Əli Evsen adlı iş adamı arasında olan ixtilaflar ucbatından baş verən bəzi "hörmətsizlik”lər onu özündən çıxarıb. Abel müəllimin fikrincə, Əli Evsen ona və oğluna lazımi diqqət göstərməyib. Hətta Abel müəllim o gecə qeyzlənərək lovğa-lovğa söyləyirmiş: "BDU elə-belə yer deyil. Minlərlə gəncin, yüzlərlə ziyalının toplaşdığı bir müəssisədir. Əgər mən istəsəm onların gücü ilə bir anda ölkədəki sabitliyi poza bilərəm.” Mənbəmizin verdiyi məlumata görə, A.Məhərrəmov hətta şeyxi gecəyarı qaldığı nömrədən çıxararaq qudasına "tərbiyə” verməsi” tələbi ilə restorana gətizdirib.

Səfər iştirakçılarından birinin dediyinə görə, o gecənin səhəri tədbirin keçirildiyi salonda da utandırıcı anlar yaşanıb. Hələ də özünə gələ bilməyən Abel müəllim, çıxış edərkən olduqca yayğın olub, məntiqsiz və rabitəsiz sözlər səsləndirib. Mənbəmizin dediyinə görə, orada olan yerli və xarici jurnalistlər, ötən gecə baş verənlərdən xəbərdar olan konfrans iştirakçıları öz aralarında pıçıldaşaraq, onun hələ də ayılmadığını deyir və rişxəndlə gülürdülər.

Bütün bunlardan sonra yəqin ki, A.Məhərrəmov özünün və oğlunun taleyini həll edib. Daha bundan sonra minlərlə tələbənin oxuduğu və çoxsaylı ziyalının işlədiyi BDU ona etibar edilməyəcək. Atalar demişkən artıq tamah baş yarar. Abel müəllimin də tamahı özünün və oğlunun başını beləcə yardı”.

Bu yazı internetin Azərbaycan seqmentində, belə demək olarsa, “bomba effekti” yaratdığı dəqiqələrdə Abel Məhərrəmov kütləvi informasiya vasitələrinə açıqlama verdi və “işdə olduğunu” söylədi. AzNews.az-ın əldə etdiyi məlumata görə, doğrudan da Abel Məhərrəmov prezidentin sərəncamı rəsmi elan olunmazdan öncə Bakı Dövlət Universitetinin Coğrafiya fakültəsində iclas keçirib.

Maraqlıdır, keçirdiyi son iclasda Abel Məhərrəmov nədən danışıb? Hər halda artıq aydındır ki, o, iclas ərəfəsində yayılan xəbərlərlə tanış imiş. Bu isə heç şübhəsiz keçmiş rektorda müəyyən əndişə yaratmaya bilməzdi.

Odur ki, AzNews.az xəbər portalının əməkdaşı Abel Məhərrəmovun rektor olaraq keçirdiyi son iclasla bağlı məlumat almaq üçün Bakı Dövlət Universitetinin Coğrafiya fakültəsinin dekanı Şəkər Məmmədovaya telefon açıb.

Dekan Şəkər Məmmədova açıqlama verməkdən imtina edərək deyib: “Bunu sizə kim deyib ki, son iclas Coğrafiya fakültəsində olub? Mən danışa bilmirəm, dərsə gedirəm”.

AzNews.az