Sürücü və piyadalara xəbərdarlıq - VİDEO

“Yol kənarı ilə getmirlər, ona görə də üstləri batır”

Yağan yağışlar nəticəsində çala-çuxurlu yolların yağış suyu ilə dolması həmin ərazilərdə xırda gölməçələrin yaranmasına səbəb olur. Həmin yollardan istifadə edən sürücülər bəzi hallarda bilərəkdən, ya da bilməyərəkdən kənardan keçən piyadaların üzərinə su sıçradırlar.

ARB TV-nin “Günə doğru” proqramı mövzu ilə bağlı maraqlı süjet hazırlayıb.

Bütün yollar təmirli deyil və elə yollar var ki, kələ-kötür, dağınıq haldadır və təbii ki, yağıntılı havalarda bu yollar keçilməz vəziyyətdə olur. İstər-istəməz, belə yollarda piyadaların üstü çirkab su ilə bulanır.

Sakin: “Az qala divara yapışası oluram ki, bir üstüm batmasın”.

Sürücülərsə, günahı piyadalarda görür.

Sürücü: “Yol kənarı ilə getmirlər, ona görə də üstləri batır”

Bu qayda pozuntusu ilə bağlı cərimə də var. Lakin DYP sözçüsünün dediyinə görə, qanunda istisnalar var. İnzibati xəta tənbehi o zaman tərtib edilir ki, baş vermiş hadisə qəsdən olmuş olsun.

Ekspert Azər Allahverənovun sözlərinə görə, piyadaların üzərinin batması çox zaman yolların bərbad olması səbəbindən baş verir ki, bu da sürücünün günahı deyil. Bununla yanaşı, bu qayda pozuntusunu sübut etmək çox çətindir.

Əslində, bu, vicdan məsələsi olmalıdır. Kiminsə avtomobil idarə etməsi həmin şəxsə ixtiyar vermir ki, yoldan keçənin üstünə su, palçıq sıçratsın. Vətəndaş belə bir halla qarşılaşan zaman 102 xidmətinə və yol polisinin 902 xidmətinə müraciət edə bilər. Lakin piyada da bu məsələləri nəzərə almalıdır.

AzNews.az