"40 milyon AZN məbləğində kompensasiya nəzərdə tutulub" "40 milyon AZN məbləğində kompensasiya nəzərdə tutulub"
  • Toplum
  • 6 Aprel 2020 15:23
  •  1 908

Təhsil Nazirliyindən tələbələrə edilən yardımla bağlı AÇIQLAMA

"40 milyon AZN məbləğində kompensasiya nəzərdə tutulub"

Təhsil Nazirliyi koronavirus pandemiyası zamanı həssas qrupa daxil olan ailələrin tələbə övladlarının təhsil haqqının ödənilməsi ilə bağlı məsələyə aydınlıq gətirib.

AzNews.az xəbər verir ki, nazir müşaviri Elnur Məmmədov bu barədə çoxsaylı sualların ünvanlandığını və layihə üzərində tamamlanma işlərinin getdiyini bildirib:

“Məlum olduğu kimi, sosial baxımdan həssas əhali qrupuna aid edilən ailələrin üzvü olan tələbələrin təhsil haqqı xərclərinin ödənilməsi üçün 40 milyon AZN məbləğində kompensasiya nəzərdə tutulub. Bu istiqamət üzrə icraçı qurumlar Təhsil və Maliyyə Nazirlikləri, icra müddəti isə 2020-ci il müəyyən edilib.

Təbii olaraq, bu tədbirin konkret olaraq hansı ailələrin üzvü olan tələbələrə aid olmasına və təhsil haqqının hansı şərtlərlə ödənilməsinə dair hazırda sosial mediada çoxsaylı suallar verilir, rəy və mülahizələr irəli sürülür. Bəzi hallarda verilən suallara şərhlərdə konkret cavablar da verilir (bu sizə aiddir/aid deyil, artıq ödənilmiş məbləğ nəzərə alınacaq/alınmayacaq, yalnız ali təhsilə aiddir və sair). Xahiş edirəm nəzərə alasınız ki, hazırda sərəncamdan irəli gələn məsələlər müzakirə olunur və qərar layihəsi üzərində iş gedir. Qərar qəbul və elan ediləndən sonra, verilən bütün suallara dəqiq cavab vermək olacaq.