Fəxriyyə Xələfova: “Bu yükü qaldıra bilmərəm”

6 Noyabr 2012 18:08 (UTC+04:00)

"Bu layihə çox çətin bir prosesdir. Azərbaycanda belə bir layihə keçirilmir. Təbii ki, bunun da ən başlıca səbəblərindən biri bu ağır yükü üzərinə götürən hər hansı bir təşkilatın olmamasıdır".

Bunu AzNews.az-a açıqlamasında modelyer Fəxriyyə Xələfova dedi. Modelyerin fikrincə, onun fərdi yaradıcılığı olduğu üçün bu ağır yükü öz üzərinə götürə bilməz: "Mənim öz fərdi yaradıcılığım var. Əgər bu yükü də əlavə olaraq öz üzərimə götürsəm, qaldıra bilmərəm. Bu çətin işdir. Mən öz moda nümayişimi təşkil edirəm. "Moda həftəsi" isə o deməkdir ki, sən orada iştirak edən 40-50 dizaynerin moda nümayişini təşkil etməlisən.

Burada bir komanda işləməlidir. Bir də ki, "Moda həftəsi" xarici ölkələrdəki kimi ənənə halını almalıdır. Mən belə ənənəni Parisdə gördüm. Mən Parisdə səhər saat 10-da moda nümayişində olmuşam. Amma bu Azərbaycanda mümkün deyil. Burada heç kəs nə saat 10-da, nə də 15-də moda nümayişinə getməz. Biz belə təmtərağa alışmışıq ki, tədbir mütləq axşam olmalıdır. Normada isə moda idman yarışları kimi keçməlidir".

Bahar Rüstəmli
AzNews.az