Dünyanın istifadə etdiyi ucuz uçuşlar - Azərbaycanda
9 Fevral 2016 19:44 (UTC+04:00)
Ucuz biletlər təklif edən "lou-kost" aviaşirkətləri Azərbaycana uçuş həyata keçirməsinə dair danışıqları hazırda davam etdirir.
AzNews.az xəbər verir ki, bunu ans press-ə açıqlamasında "Azərbaycan Hava Yolları"nın (AZAL) mətbuat xidmətinin rəhbəri Paşa Kəsəmənski bildirib. Onun sözlərinə görə, hazırda İstanbuldan Qəbələ və Lənkəran hava limanlarına türk aviaşirkətləri "Pegasus" və "Atlasjet" tərəfindən uçuşların yerinə yetirilməsi məsələsi müzakirə olunur.
"Bundan başqa, "Air Arabia" büdcə aviaşirkəti Birləşmiş Ərəb Əmirliklərinin böyüklüyünə görə üçüncü şəhəri - Şarjadan Bakı, Qəbələ və Azərbaycanın digər regionlarına birbaşa reyslər aça bilər", - Kəsəmənski bildirdi.
O, həmçinin qeyd edib ki, İsrailin milli aviadaşıyıcısı - "El Al" Israel Airlines aviaşirkətinin nümayəndə heyəti Azərbaycana səfər edərək Bakıda Heydər Əliyev Beynəlxalq Hava Limanında aviasiya təhlükəsizliyi sahəsində audit yoxlamaları həyata keçirib. "El Al" şirkətinin nümayəndələri 2016-cı ildə İsrailin "El Al" və "Arkia" aviaşirkətlərinin Təl-Əviv-dən Bakıya birbaşa reyslər açmaq planları barədə elan edib.
Bu yaxınlarda Rusiyanın "UTair" və "Ural Hava Yolları" aviaşirkətləri tərəfindən Bakı, Lənkəran və Gəncə hava limanlarında bir sıra audit yoxlamaları həyata keçirilib. Aviaşirkətlərin nümayəndələri audit yoxlamalarının nəticələrinə görə aviasiya təhlükəsizliyinin təşkili və sərnişin reyslərində xidmət səviyyəsini yüksək qiymətləndirib", - deyə qurumdan bildirdilər.
Öz adını ingiliscə "low-cost carrier", yəni aşağı qiymətli daşıyıcı sözlərindən almış bu uçuş növü 1990-cı illərdə ABŞ-da yaransa da, indi dünyanın əksər ölkələrində aparıcı trendə çevrilib.
Qlobal bronlaşdırma sistemi "Amadeus"un məlumatına görə, dünya üzrə uçuşların 38%-i lou-kost reyslərin payına düşür. İspaniyada (57%) və Böyük Britaniyada (52%) lou-kost uçuşlar üstünlük təşkil edir. Avstraliya bu uçuşların payı 36,6%-ə, Şimali Amerikada 30,2%-ə, Latın Amerikasında 24,9%-ə bərabərdir. Asiya (18,6%), Yaxın Şərq (13,5%) və Afrika (9,9%) ölkələri isə bu məsələdə xeyli geri qalır.
Lou-kost reyslərdə aşağı qiymətlər xidmət sayının məhdud olması ilə əldə edilir. Adətən, yerlər vahid sərnişin klassı üzrə satılır, texniki xidmət xərclərini azaltmaq məqsədi ilə vahid tipli təyyarələrdən (adətən "Airbus A320" və ya "Boeing 737"dən) istifadə edirlər. Bir qayda olaraq, biletlər birbaşa internetlə satılır, arada vasitəçilərin olmaması da biletlərin ucuz satılmasına səbəb olur.
Lou-kost şirkətlərin bu cür ucuz qiymətləri adətən geniş turist axınının maqnit kimi özünə cəlb edir. Odur ki, bu sistemin ölkəmizdə tətbiq edilməsi əslində bu gün üçün zəruri olan məsələlərdən biridir. Əks halda, Azərbaycanın turizm sektoru iflasa uğraya bilər.