Azərbaycanlıları çaşdıran miras problemi - Qanuni yolları

7 Mart 2016 22:35 (UTC+04:00)

AzNews.az-ın ans press-ə istinadən məlumatına görə, bunun əsas səbəbi çox vaxt vətəndaşların qanundan xəbərsiz olmalarıdır.

Buna görə son dövrlər əmlak mübahisələri ilə bağlı məhkəmələrin sayı da artıb. Problemin yaranmasına səbəb ölkənin Mülki Məcəlləsində nəzərdə tutulmuş vərəsəlik haqqında qanuna vətəndaşların düzgün əməl etməməsi və bilərəkdən pozmasıdır.

"Qanun üzrə vərəsələr 6 ay müddətində notariat qaydada təyin olunur"
Məsələ ilə əlaqədar Milli Məclisin hüquq siyasəti komitəsinin üzvü Çingiz Qənizadə qanun üzrə vərəsələrin 6 ay müddətində notariat qaydada təyin olunduğunu dedi: "6 ay müddətinə 5 dərəcəli vərəsələr müəyyən olunur. Birinci dərəcəlilər mərhumun övladları olur. İkinci dərəcədə həyat yoldaşı, valdeynlər, bacı-qardaş durur. Üçüncüdə nənələr, babalar, dördüncüdə xala, dayı, bibi, əmi, beşinci də isə dayı, xala, bibi, əmi uşaqları varis sayıla bilər. Əgər ölən şəxsin birinci növbəli qohumu yoxdursa, varislik avtomatik olaraq növbəti qohuma keçir", - deyə millət vəkili bildirdi.


Ölmüş şəxsin mülkünün bölüşdürülməsi

Çingiz Qənizadə onu da vurğuladı ki, əgər ortada vəsiyyətnamə varsa, o zaman miras payının kimə çatacağı bu sənədlə müəyyənləşdirilir. Yəni həmin sənəddə şəxs övladını yox, istədiyi hər hansı bir insana mirasını verə bilər. Amma bu zaman da ölən şəxsin qohumlarından kimsə vərəsə kimi notariat kontoruna müraciət edə bilər və onun vərəsəliyi təsdiqlənərsə, mirasdan bir hissə ona da düşə bilər.

Millət vəkili əlavə etdi ki, mirasın bölüşdürülməsi dərəcəliyə görə müəyyən olunur. Birinci dərəcəli şəxs (şəxslər) digər dərəcələrə görə mirasdan daha çox pay götürür.


Çingzi Qənizadə - millət vəkili

Hüquqşünas Tahir Əlirzayev deyir ki, ölmüş şəxsin mülkünə həbs iki halda qoyula bilər: ya həmin mülkün cinayət yolu ilə əldə edildiyi aşkarlanarsa, ya da mülk üzərində varislər arasında məhkəmə çəkişməsi olarsa.