Mehriban Əliyeva şəhid anaları ilə görüşdə ağladı

7 Aprel 2016 20:48 (UTC+04:00)

Ehsan mərasimində Heydə Əliyev Fondunu prezidenti Mehriban Əliyeva, Vətən uğrunda şəhid olan və yaralanan hərbçilərin anaları, ictimaiyyətin nümayəndələri iştirak ediblər.

Azərbaycanın 1-ci xanımı, Heydər Əliyev Fondunu prezidenti Mehriban Əliyeva Heydər Məscidinə gələrək, son günlər qoşunların təmas xəttində düşmən tərəfindən atəşkəsin pozulması nəticəsində Vətən uğrunda qəhramanlıqla şəhid olan və yaralanan hərbçilərin ailə üzvləri və yaxınları ilə görüşüb. Mehriban Əliyeva təmas xəttində Ermənistan hərbi qüvvələrinin Azərbaycana qarşı törətdikləri son təxribatlar nəticəsində həlak olan Azərbaycan oğullarına Allahdan rəhmət, yaralananlara isə şəfa diləyib.

Sonra müqəddəs Qurani Kərimdən ayələr oxunub. Qoşunların təmas xəttində ermənilərin təxribatının qarşısını alarkən qəhrəmanlıqla şəhid olan hərbçilərin ruhuna Heydər Əliyev Fondunun prezidenti Mehriban Əliyevanın adından ehsan verilib. Mehriban Əliyeva son günlərdə Vətənin müdafiəsi uğrunda şəhid olan 31 hərbçinin ailə üzvlərinə, yaxınlarına başsağlığı verib, yaralıların tezlikə sağalmasını arzulayıb.

Şəhid hərbçilərimizin qohumları ağır itki ilə üzləşdiklərini söyləsələr də, şəhidlərimizin hər bir vətəndaş üçün müqəddəs olan Vətən uğrunda öz canlarından keçdiklərini dedilər. Qeyd edibər ki, Azərbaycan Silahlı Qüvvələrinin erməni işğalçılarına verdiyi tutarlı cavabdan qürurlanırlar. Onlar bildirdilər ki, Azərbaycan Ordusu xalqımıza erməni silahlı birləşmələrinə qarşı apardıqları əməliyyatlarda qazanılan zəfərin sevincini yaşadıb. Şəhid olan və yaralanan hərbçilərin ailə üzvləri Azərbaycan Ordusundan yeni qələbə xəbərləri eşitmək arzusunda olduqlarını dedilər, Azərbaycanın tezliklə işğal altındakı torpaqlarının geri qaytarılacağını əminliklərini ifadə etdilər. Göstərilən diqqət və dəstəyə görə Azərbaycan dövlətinə və xalqımıza minnətdarlıqlarını bildirən şəhid və yaralı hərbçilərimizin ailə üzvləri Qüdrətli Ordumuzun düşmənlərimizə vurduğu sarsıdıcı zərbələrdən qürur hissi keçirdiklərini bildiriblər.

Qeyd edək ki, birinci xanım şəhid analarının qarşısında baş əyərək göz yaşlarını saxlaya bilməyib.


Qafqazinfo