Hüquq müdafiəçisi etiraz aksiyalarında saxlanılan şəxslərlə görüşüb

28 Yanvar 2013 15:17 (UTC+04:00)

İşgəncələrə Qarşı Azərbaycan Komitəsinin sədri Elçin Behbudov köməkçisi Elçin Şirinovla birlikdə Daxili İşlər Nazirliyinin (DİN) tabeliyində olan İnzibati Qaydada Həbs Olunanların Saxlanma Məntəqəsində monitorinq keçirib. Bu barədə APA-ya E. Behbudov özü məlumat verib.

E. Behbudov bildirib ki, orada 26 yanvar tarixində Bakıda bir qrup gəncin keçirdiyi etiraz aksiyası zamanı saxlanılan 5 nəfərlə görüşüb: "Həmin şəxslərin saxlanma şəraitindən və onlara qarşı münasibətdən şikayətləri yoxdur. Daha sonra orada saxlanılan AXCP-nin Binəqədi rayon Təşkilatının sədr müavini Paşa Dadaşovla görüşdüm. Həmin şəxs yanvarın 21-də Bakıda təbliğat vərəqələri payladığına görə 7 gün müddətinə inzibati qaydada həbs olunub. Hər hansı şikayəti yoxdur".

E. Behbudov, həmçinin yanvarın 19-da "Binə" ticarət mərkəzində keçirilən etiraz aksiyası zamanı saxlanılan şəxslərlə də görüşdüyünü deyib: "Orada həmin aksiya zamanı saxlanılan 10 nəfərlə görüşdüm. Onlara qarşı münasibətdən şikayətləri olmasa da özlərini təqsirli bilmədiklərini dedilər. Bildirdilər ki, polisə daş atmayıblar. Hər hansı zorakılığa yol verməyiblər".

AzNews.az