Kubanın “Bohemia” jurnalı İslamiadadan yazdı

23 May 2017 14:45 (UTC+04:00)

AzNews.az Azərtac-a istinadən xəbər verir ki, “Zirvəyə doğru yüksələn ölkədə daha bir böyük idman hadisəsi” adlı məqalədə İslam Həmrəyliyi Oyunlarının qalibi olmuş Azərbaycanda xüsusi dövlət proqramına uyğun olaraq kütləvi və peşəkar idmanın inkişaf etdirilməsindən söz açılır, bu mühüm siyasətin əsasını ümummilli lider Heydər Əliyevin qoyduğu və hazırda Prezident İlham Əliyev tərəfindən böyük uğurla davam etdirildiyi vurğulanır.

Məqalədə Azərbaycanın Birinci vitse-prezidenti, IV İslam Həmrəyliyi Oyunlarının Təşkilat Komitəsinin sədri Mehriban Əliyevanın yarışların təşkilində mühüm xidmətləri qeyd edilərək, “Bakı-2017”nin olduqca yüksək səviyyədə təşkil edildiyi, heyranedici açılış və bağlanış mərasimləri ilə yaddaşlarda qalacağı bildirilir. Qeyd edilir ki, “Gücümüz həmrəylikdədir” devizi ilə keçirilmiş bu idman bayramı qardaşlıq və birlik ideyalarını özündə daşıyan İslam mədəniyyətinə məxsus müxtəlif cəmiyyətləri Bakıda birləşdirdi.

Müəllif Azərbaycanın Birinci vitse-prezidenti Mehriban Əliyevanın çıxışına istinadən qeyd edir ki, birinci Avropa Oyunları zamanı bütün qitəni birləşdirərək tarix yazmış Azərbaycan hazırda “Bakı-2017” çərçivəsində sülh, tolerantlıq və xeyirxahlıq ideyaları altında dörd qitəni təmsil edən İslam dünyasını bir araya gətirib. Vurğulanır ki, bütün bunlar Azərbaycanın dinamik inkişafının bariz nümunəsidir. Minillərlə ölçülən qədim tarixə malik Azərbaycan sürətlə inkişaf edən müstəqil ölkədir. Burada çoxmədəniyyətlilik ənənələrinə söykənən, açıq və tolerant bir cəmiyyət mövcuddur.

Daha sonra müəllif IV İslam Həmrəyliyi Oyunlarının simvolu kimi dünyada məşhur olan Qarabağ atlarından, habelə Azərbaycanın milli atüstü idman növlərindən olan çövkəndən, yaylıqqaçırtdı, sürpapaq oyunları kimi xalqımızın zəngin mədəniyyətinin bir hissəsi olan milli idman ənənələrindən bəhs edir. Bildirilir ki, çövkən atüstü oyunu haqda Dədə Qorqud salnaməsində, Nizami Gəncəvinin “Xosrov və Şirin” poemasında qeyd olunan tarixi məlumatlara rast gəlmək olar. Eyni zamanda, güləş, boks, cüdo, şahmat və sair idman növləri üzrə bütün dünyada məşhur idmançılar yetişdirmiş Azərbaycanda futbolun çox sevilən idman növü olmasından söz açılır, Azərbaycanın ən məşhur futbol komandasının isə məhz “Qarabağ” futbol klubunun olduğu diqqətə çatdırılır.

Məqalədə qeyd edilir ki, son on ildən çox müddətdə Azərbaycanda müxtəlif miqyaslı yüzlərlə beynəlxalq idman yarışı, o cümlədən Avropa və dünya birincilikləri çox yüksək səviyyədə keçirilib. Müəllif xüsusi olaraq vurğulayır ki, böyük beynəlxalq idman tədbirlərinin mükəmməl təşkilinə, habelə idmançılar və bütün qonaqların ehtiyaclarının lazımı şəkildə qarşılanmasına zəmanət verə bildiyinə görə Azərbaycan dünya miqyasında vacib idman ölkəsi kimi böyük nüfuz və etimad qazanıb. Bu xüsusda, həmçinin Bakıda keçirilmiş Avropa Oyunları, Ümumdünya Şahmat Olimpiadası, Formula-1 yarışları barədə məlumat verilir və bütün bunların beynəlxalq Olimpiya ailəsi tərəfindən Azərbaycana olan marağın daha da böyüməsinə və ölkəmizin irimiqyaslı beynəlxalq yarışların keçirildiyi mərkəzə çevrilməsinə səbəb olduğu vurğulanır.

Məqalədə, həmçinin son zamanlarda Azərbaycan və Kuba arasında idman sektorunda uğurlu əməkdaşlıq əlaqələrinin inkişaf etdirilməsindən söz açılır. Bu xüsusda, iki ölkənin yunan-Roma və sərbəst güləş üzrə yığma komandalarının 2016-cı ilin may ayında Azərbaycanda birgə təlim-məşq toplantıları keçirməsi, həmçinin Bakıda ötən ilin sentyabr ayında Azərbaycan və Kuba Şahmat federasiyaları arasında əməkdaşlıq haqqında Anlaşma Memorandumunun imzalanması barədə məlumat verilir.