Bunu AzNews.az-a açıqlamasında Əfv komissiyasının üzvü Əliməmməd Nuriyev millət vəkili Siyavuş Novruzovun amnistiya aktının imzalanması ilə bağlı Azərbaycan prezidenti İlham Əliyevə müraciətini şərh edərkən deyib.
Onun sözlərinə görə, Azərbaycan Xalq Cümhurriyyətinin 100, mərhum prezident Heydər Əliyevin isə 95 illiyindən hər kəsə sevinc payı düşür:
“Biz hər zaman deyirdik ki, 2018-ci il yubileylər ilidir. Bu il həm Azərbaycan Xalq Cümhurriyyətinin 100 illiyi, həm də mərhum prezident Heydər Əliyevin 95 illiyidir. Milli Məclisin deputatı Siyavuş Novruzovun bu təşəbbüslə çıxış etməsi alqışlanmalıdır. Ümid edirəm ki, bu iki yubileylə bağlı amnistiya aktı imzalanacaq. Bu çox mühüm qərarlardan biri olacaq. Milli Məclis mərhəmət nümayiş etdirsəydi, bu mühim tarixlərdən hər bir vətəndaşa sevinc payı düşərdi. İnanıram ki, Milli Məclisin bu dəfəki qərarı daha çox sayda məhkuma şamil olunacaq”.
Əliməmməd Nuriyev qeyd edib ki, bu günə kimi qəbul olunan amnistiya aktlarından fərqli olaraq nəzərdə tutulan növbəti amnistiya daha çox məhkumlara şamil oluna bilər: “Bu günə kimi amnistiyalar az ağır cinayətlərə şamil edilib. Güman edirəm ki, indiki hazırlanacaq amnistiya bu və ya digər formada bütün məhkumlara şamil olunacaq”.
Qeyd edək ki, Millət vəkili Siyavuş Novruzun amnistiya aktının imzalanması ilə bağlı Azərbaycan prezidenti İlham Əliyevə müraciət edib. Deputat müraciətində Azərbaycan Xalq Cümhurriyyətinin 100, mərhum prezident Heydər Əliyevin isə 95 illiyi ilə əlaqədar amnistiya aktının imzalanması təklifi ilə çıxış edib.
Bahar RÜSTƏMLİ
AzNews.az