Bu gün xalq artisti, sevilən aktyor Hamlet Xanızadənin doğum günüdür.
Aktyor 1941-ci ildə Bakının Şağan qəsəbəsində dünyaya göz açıb. Atası Bəbir kişi onu aktyor görmək istəmirmiş. Amma balaca Hamletin qəlbində baş qaldıran aktyorluq həvəsi hər şeyə qalib gəlib. Uşaqlıqdan teatra, kinoya meyilli olan Hamlet 1961-ci ildən aktyor kimi Akademik Dram Teatrında çalışıb.
Çox tamaşalarda oynayıb. Onların adlarını sadalamaqla qurtaran deyil. Tərəf-müqabilləri də ki, səhnəmizin ulduzları olub: Mehdi Məmmədov, Əliağa Ağayev, Ağasadıq Gəraybəyli, İsmayıl Osmanlı, Hökumə Qurbanova, İsmayıl Dağıstanlı və onlarla müqtədir sənət korifeyləri ilə birgə işləyib, sənətin sirlərini mənimsəyib.
Bu teatr onun üçün həm də məktəb idi. Hünərin nə idi ki, belə sənətkarların qarşısında nəyi isə səhv edəsən, nəyi isə nəzərdən qaçırasan. Hamlet Xanızadə burada püxtələşdi, tamaşaçıların qəlbinə yol tapdı. Onu sevirdilər, alqışlayırdılar.
Sevilən aktyorumuz 1990-cı ilin Yanvar hadisələrində həlak olmadı. Amma keçirdiyi dəhşətli sarsıntı onun sonunu yaxınlaşdırdı. Milli faciənin ağırlığına dözməyən ürəyi cəmi bir ay sonra əbədi olaraq susdu. Məhz bu səbəbdən o da 20 Yanvar faciəsinin qurbanı sayıldı.
AzNews.az