Avropa Birliyi və ABŞ-ın Krım Qərarı

26 İyul 2018 14:00 (UTC+04:00)

Modern.az xarici mətbuata istinadən xəbər verir ki, ABŞ Krımın qanunsuz ilhaqının tanınmaması və bu sahədə dəyişməz mövqe nümayiş etdirilməsi haqda bəyannamə qəbul edib.

“ABŞ-ın Krımla bağlı bəyannaməsi Rusiya tərəfindən Krımın qeyri-qanuni birləşdirilməsi və Ukrayna ərazisinin bütövlüyünün pozulması ilə bağlı ardıcıl, güclü və prinsipial mövqeyini əks etdirir. AB-nin xarici siyasət və təhlükəsizlik üzrə ali nümayəndəsi Federika Moqerininin 2018-ci il 16 mart bəyannaməsində bildirdiyi kimi AB qanunsuz birləşdirməni qəbul etmir və qınayır” – AB-nin xarici siyasət xidmətindən çərşənbə günü bəyan edilib.

Bəyannamədə Ukraynanın ərazi bütövlüyü dəstəklənir və Rusiyanın bu əməli qınanır. Həmçinin Rusiyanın bu hərəkətinin digər dövlətlərin də ərazi bütövlüklərinə təhlükə yarada biləcəyi vurğulanır.

ABŞ-ın Krımın Rusiyanın tərkibinə qanunsuz birləşdirilməsinin tanınmaması barədə bəyannaməsi dövlət katibi Mayk Pampeonun imzası ilə çərşənbə günü yayımlanıb.

Qeyd edək ki, Rusiya XİN-nin rəsmi nümayəndəsi Mariya Zaxarova isə bu məsələyə öz Facebook hesabında satirik yanaşıb. O, bu cür sənədlərin “dəyərini” bildiklərini qeyd edib. XİN-nin nümayəndəsi İranla nüvə razılaşmasının və iqlim müqaviləsinin də nə vaxtsa ABŞ-ın əsas siyasəti kimi müəyyənləşdirildiyinə diqqət çəkib. Zaxarova “Şəxsən Obama belə qərar verdi, sonra isə Tramp qərarı dəyişdi” – Facebookda yazıb.

AzNews.az