AVRO-2020-nin seçmə mərhələsinin Portuqaliya – Serbiya oyununda zədələndiyi üçün əvəzlənən Kriştiano Ronaldonun durumuna aydınlıq gəlib.
Top uğrunda mübarizədə havaya qalxarkən uğursuz cəhd edərək yıxıldığı anda əzələsini dartan hücumçu 1-2 həftəyə sıraya dönəcək.
Bunu qarşılaşmanın 30-cu dəqiqəsində əvəzlənən ulduz futbolçunun özü açıqlayıb: “Mən zədəmdən narahat deyiləm, çünki öz orqanizmimə bələdəm. Bir-iki həftəyə sıraya dönməliyəm”.
K.Ronaldonun çıxış etdiyi İtaliya “Yuventus”u ilə Çempionlar Liqasının 1/4 final mərhələsinin ilk oyunundakı iştirakı isə sual altındadır. Hollandiya “Ayaks”ı ilə Amsterdamdakı matç aprelin 10-da baş tutacaq.
Qeyd edək ki, AVRO-2020-nin seçmə mərhələsinin Portuqaliya – Serbiya oyunu 1:1 hesabı ilə başa çatıb. (ONA)