Sürücülərə qarşı cəzalar sərtləşdirilir
1 May 2013 09:39 (UTC+04:00)
Trend-in məlumatına görə, bu barədə məsələ Milli Məclisdə İnzibati Xətalar Məcəlləsinə təklif olunan dəyişiklikdə nəzərdə tutulur.
Məcəllənin 152-ci maddəsinə təklif olunan dəyişikliyə görə, nəqliyyat vasitəsini idarəetmə hüququ olmadan idarə edərkən törədilən xəta nəticəsində zərər çəkən şəxsin sağlamlığına yüngül bədən xəsarətinin yetirilməsinə və ya zərər çəkən şəxsə maddi zərər vurulmasına görə 400 manat miqdarında cərimə və ya bir ayadək inzibati həbs tətbiq olunacaq.
Qeyd edək ki, hazırda qüvvədə olan qanunvericiliyə görə, inzibati həbs müddəti 15 gün nəzərdə tutulur.
Məcəlləyə edilən dəyişikliyə görə, eyni zamanda, nəqliyyat vasitəsini idarə etmək hüququ olan şəxs tərəfindən alkoqoldan, narkotik vasitələrdən, psixotrop maddələrdən və ya güclü təsir göstərən digər maddələrdən istifadə olunması zamanı törədilən xəta nəticəsində zərər çəkən şəxsin sağlamlığına yüngül bədən xəsarətinin yetirilməsinə və ya zərər çəkən şəxsə maddi zərər vurulmasına görə nəqliyyat vasitəsini idarəetmə hüququ 2 il müddətinə məhdudlaşdırılmaqla 700 manat miqdarında cərimə və ya 15 gündən bir ayadək inzibati həbs tətbiq olunacaq.
Hazırda qüvvədə olan qanunvericiliyə görə, bu maddə üzrə də inzibati həbs müddəti 15 günədək nəzərdə tutulur.
AzNews.az