“Gülər xanıma cəzanı da özləri müəyyənləşdirsinlər” - VƏKİLİ

2 May 2013 13:05 (UTC+04:00)

Gülər Əhmədovanın cinayətinin tam sübuta yetirilməsi ilə bağlı Baş Prokurorluğun mətbuat xidmətinin rəhbəri Eldar Sultanovun mətbuata verdiyi açıqlama qarşı tərəfin narazılığına səbəb olub. G. Əhmədovanın vəkili Raqif Mustafayev prokurorluğun bəyanatına münasibət bildirərək istintaq orqanını lazımsız bəyanatlarda günahlandırıb: "Deyirlər ki, Bakı şəhər Prokurorluğunda aparılmış istintaqla Gülər Əhmədova tərəfindən etibardan sui-istifadə etməklə özgənin külli miqdarda əmlakını ələ keçirmə və qabaqcadan vəd etmədən ağır cinayəti gizlətmə cinayətlərini törətməsi tam sübuta yetirilib. Əgər belədirsə, niyə işi məhkəməyə göndərmirlər? Çünki sübut dedikləri əslində, sübut deyil, buna görə də işi məhkəməyə göndərə bilmirlər. Əgər deyilirsə ki, sübut olunub, o zaman məhkəməyə nə ehtiyac var, cəzanı da özləri müəyyənləşdirsinlər".

R. Mustafayev G. Əhmədovanın vəkili olmuş Eldar Qədiminin onun ünvanına səsləndirdiyi fikirlərə də münasibət bildirib. Qeyd edək ki, E.Qədimi mətbuata açıqlamasında R. Mustafayevi nəzərdə tutaraq, "o nağılbaz vəkil hələ çox şey danışacaq" deyib. R. Mustafayev isə bu fikirlərin vəkillik fəaliyyəti ilə bir araya sığmadığını bildirərək, G. Əhmədovanın E. Qədimidən imtinasının səbəbini ikincinin fəaliyyətsizliyi ilə əlaqələndirib: "Dəfələrlə Eldar Qədimiyə çatdırmışam ki, Gülər xanım onunla görüşmək istəyir. Ancaq Eldar Qədimi təcridxanaya getməyib. Belə olan halda mənə ancaq Gülər Əhmədovanın vəkilindən imtinası ilə bağlı ərizəsini istintaqa təqdim etmək qalır. Eldar Qədimi vəkil olduğu müddətdə heç bir iş görməyib. Buna görə də indi onun məni nağılbaz adlandırması gülüncdür".

Elnarə Əlosmanqızı
AzNews.az