"Çelsi"nin qalib gəlməsini istəyirdim, o komanda da qalib gəldi - Murad Dadaşov

Xəbər verdiyimiz kimi ötən gün Bakı Olimpiya Stadionunda UEFA Avropa Liqasının final oyununda iki ingilis klubu “Arsenal”la “Çelsi” üz-üzə gəlib. “Çelsi” rəqibinə 4:1 hesabı ilə qalib gəlib.

AzNews.az məşhurlara “Ötən gün ölkəmizdə “Çelsi” ilə “Arsenal”ın final oyunu baş tutdu. Hansı futbol komandasına azarkeşlik edirdiniz və “Çelsi”nin qalib gəlməsinə münasibətiniz necə oldu?” sualı ilə müraciət edib.

Xalq artisti Murad Dadaşov: "Ümumiyyətlə, “Qarabağ" futbol klubuna azarkeşlik edirəm. Dünənki oyuna gəlincə 70 minlik stadiona azarkeşlik edirdim. Amma müəyyən məsələlərə görə "Çelsi"nin qalib gəlməsini istəyirdim, o komanda da qalib gəldi. Ölkəmizdə “Arsenal” klubunun yarımüdafiəçisi Henrix Mxitaryanın formasını görmək istəmirdim".

Müğənni Zamiq Hüseynov: “Hər kəsin öz favorit komandası var. “Çelsi” klubunu çox sevirəm və oyunlarını sevə-sevə izləyirəm. Amma “Arsenal” mənim uşaqlıq sevdamdır. O klubda da çox sevdiyim oyunçular olub. Türk qardaşımız Mesut Özil “Arsenal"da olduğu üçün çox istəyirdim ki, “Arsenal” qazansın”.

Aparıcı-aktyor İlkin Həsənli: “Çelsi” azarkeşi deyiləm. Amma bu komandanın qalib gəlməsini istəyirdim, elə də oldu”.

Meyxanaçı-müğənni Namiq Qaraçuxurlu: "Futbola o qədər də marağım yoxdur. Ara-sıra tanınmış futbolçuların oyunlarına baxıram. Bu dəfə isə ayağımdan əməliyyat olunduğum üçün səhhətimlə məşğul idim. Bu oyunu nə izləyə, nə də azarkeşlik edə bildim”.

Aparıcı Aytən Səfərova: "Qızım "Çelsi" komandasını dəstəkləyirdi. "Çelsi" də qalib gəldi və onun üçün ikiqat bayram oldu. Mən isə möhtəşəm final oyunu izlədim".

Müğənni Eldar Qasımov: “Futbol azarkeşi deyiləm. Sadəcə istəyirdim ki, hər iki komanda Bakımda keçirilən oyundan böyük zövq alsınlar və unudulumaz xatirələrlə vətənlərinə dönsünlər”.

Əməkdar artist Tünzalə Ağayeva: "Final oyununda vətənimdə keçirilən böyük hadisə olduğu üçün iştirak etdim. Sadəcə Azərbaycan futbolçularına pərəstiş edirəm".

Rəqsanə

AzNews.az