"1993-cü ilin 15 iyununda Heydər Əliyevin hakimiyyətə gəlişi ilə Azərbaycan tarixində yeni mərhələ başlandı".
Bu fikirləri jurnalistlərə açıqlamasında Baş nazirin müavini, YAP-ın sədr müavini - icra katibi Əli Əhmədov deyib.
O bildirib ki, Azərbaycan ikinci dəfə müstəqilliyinə qovuşduqdan sonra hər bir ölkə vətəndaşına məlum olan xaos, anarxiya, müstəqilliyin əldə getməsi təhlükəsi yaranmışdı: "Azərbaycan xalqı ölkəmizin düçar olduğu vəziyyətdən xilas olmasının yeganə yolunun Heydər Əliyevin hakimiyyətə gəlməsində gördü. İnsanları narahat edən, xalqı vahiməyə salan bütün proseslər dəf edildi, xaos, anarxiya, özbaşınalıq aradan qaldırıldı".
Ə.Əhmədov qeyd edib ki, o zaman Azərbaycanın parçalanması təhlükəsini yaratmış separatizm ləğv edildi, ermənilərin Azərbaycan ərazilərinin dərinliklərinə gəlməsinin qarşısı alındı: "Ən başlıcası isə ölkəni bürümüş siyasi və iqtisadi böhrandan ölkə çıxa bildi, hakimiyyət böhranı da aradan qaldırıldı. İnsanların çörək növbələrinə durması kimi dəhşətli mənzərə qısa müddətdə aradan qaldırıldı və beləliklə Azərbaycanda sözün həqiqi mənasında normal həyat təmin edilmiş oldu".
"Azərbaycanın müstəqilliyi möhkəm və etibarlı bünövrə üzərində qoyuldu" - deyən YAP sədrinin müavini əlavə edib ki, Azərbaycanda dərin Heydər Əliyev islahatları həyata keçirilməyə başlandı: "Bu gün Azərbaycan ən güclü, ən müasir dövlətlər içərisində özünə layiqli yer tutur. Vətəndaşlar özlərini xoşbəxt hesab edirlər ki, müstəqil Azərbaycan vətəndaşlarıdır. Bütün bu uğurlar, nailiyyətlər 26 il bundan əvvəl ulu öndərin Azərbaycana dönüşünün nəticəsidir. Heydər Əliyev siyasəti onun vəfatından sonra da uğurla həyata keçirilir. Prezident İlham Əliyevin rəhbərliyi altında Azərbaycan daha da inkişaf edir və hesab edirik ki, bu inkişaf uzunmüddətli olacaq və vətəndaşların rifahı daha da yaxşılaşdırılacaq. Bugünkü Azərbaycan vətəndaşlarının həyatındakı inkişafında Heydər Əliyevin neft strategiyası əsas yer tutur".(report.az)
AzNews.az