Oktyabrın 13-də keçirilən qurultayda T.Yaqublunun başqanlığa namizəd olmasında belə, bu isti əlaqələrin rolu var idi. Ə.Kərimlinin başlıca niyyəti T.Yaqublunun Müsavat başqanı olmasına dəstək verməklə gələcəkdə bu siyasi təşkilata tam nəzarət etmək idi. Təbii ki, əgər qurultayda səsvermə, təbliğat-təşviqat, rəqabətlilik tam şəffaf şəkildə, bərabərhüquqlu vəziyyətdə keçsəydi, bəlkə də AXCP sədri bu istəyinə nail ola bilərdi. Lakin Müsavatın sabiq başqanı İsa Qənbərin qurultay öncəsi tərəf tutması, açıq şəkildə növbəti dəfə A.Hacılıya dəstək nümayiş etdirməsi, üstəlik qurultay üzvlərinə edilən basqılar nəticəni dəyişib. Bu dəfə də başqan A.Hacılı "seçilib”. Bu seçki şousundan dərhal sonra başqanlığa digər namizəd, cəmi 20 səs "toplaya bilən” Yadigar Sadıqlı bəyan edib ki, seçki çox ədalətsiz olub. Y.Sadıqlı gördüyü mənzərədən o qədər hiddətlənib ki, A.Hacılını təbrik də etməyib, qurultayın keçirildiyi məkanı acıqla tərk edib. Qurultay üzvlərindən 51 nəfərinin "səsini toplayan” T.Yaqublu isə A.Hacılını yenidən başqan "seçilməsi” münasibətilə təbrik edərək, ictimaiyyətə guya məğlubiyyəti qəbul etdiyini çatdırıb.
Ancaq qurultaydan sonra sosial şəbəkədə yazılan statuslar, aparılan müzakirələr tamam başqa mənzərə ortaya qoyub. AXCP sədri Ə.Kərimlinin Müsavatı ələ keçirmək planı iflasa uğradığı üçün cəbhəçilərdən ibarət söyüş ordusu A.Hacılının yenidən başqan seçilməsini lağlağı predmetinə çeviriblər. Ə.Kərimlinin dəstəkçiləri, hətta xaricə sığınaraq Azərbaycan əleyhinə qaralama kampaniyası aparanlar da A.Hacılını hədəfə alıblar. Sabiq diplomat, antimilli mövqe tutaraq Avropaya sığınan, Ə.Kərimlini özünün lideri elan edən Arif Məmmədov müsavatçı T.Yaqublunun fotosunu "Facebook” profilində paylaşaraq, qurultayın nəticəsinin nə olmasına baxmayaraq, yalnız onu başqan gözündə gördüyünü nümayiş etdirib. AXCP sədrinin mətbuat katibi funksiyasını yerinə yetirən, Amerikada yaşayan Sevinc Osmanqızı "Müsavat da belə getdi. İsa Qənbər, demək olar, sıçrayış etdi” – yazaraq, qurultayın nəticəsinə ironik yanaşma ortaya qoyub. Antimilli "MeydanTv”nin rəhbəri Həbib Müntəzir də "Müsavatın yeni başqanı 78 faiz səslə İsArif bəy oldu. Təbrik edirəm!” yazmaqla, qurultayda saxtakarlığa yol verildiyini diqqətə çatdırıb.
Bütün bu sadalananlar bir daha göstərib ki, öz partiyalarında normal qurultay, seçki keçirməyi bacarmayan, qaraguruhçuluğu həyat tərzi seçən, iqtidarın yürütdüyü siyasətə qarşı çıxan "radikalların” səsləndirdiyi ən müxtəlif fikirlər boğazdan yuxarı söylənən söz yığınıdır. Kiçik bir təşkilatda demokratlıq nümayiş etdirə bilməyənlərin hakimiyyəti antidemokratiyada ittiham etməsi sadəcə gülüş doğurur, "liderlərin” əsl mahiyyətini ortaya qoyur.