“Bin Laden budurmu?“: Həbsdəki dindarla bağlı şok məlumat
23 May 2013 16:34 (UTC+04:00)
Mayın 23-də Bakı Ağır Cinayətlər Məhkəməsində "Azadxeber.org" saytının baş redaktoru Nicat Əliyevin işi üzrə proses olub.
Vəkil Anar Qasımlı AzNews.az-a deyib ki, Nicat Əliyev ifadəsində polis əməkdaşlarının ona qarşı davranışından danışıb: "Nicat Əliyev ifadəsində bildirdi ki, tutulan zaman Yasamal Rayon Polis İdarəsində və rayonun 27-ci polis bölməsində vəhşicəsinə döyülüb, işgəncəyə məruz qalıb. Dediyinə görə, hətta onu İsrail səfirliyinə aparıblar. Səfirliyin bir nümayəndəsi "Bin Laden budurmu?" deyə rişxənd edib, onu döyməyə başlayıb".
Vəkil məhkəmə qarşısında bir neçə vəsatət qaldırdığını bildirib: "Bu məsələlərin araşdırılması üçün prokurorluğa məlumat verilməsini, Bakı İstintaq Təcridxanasına daxil olanda üzərindəki xəsarətlər haqqında arayış alınmasını istədik. Məhkəmə bu vəsatətləri təmin etdi. Nicat Əliyev tutulmamışdan əvvəl MTN-ə aparıldığını da dedi. MTN-ə nə məqsədlə aparıldığını araşdırmaq üçün sorğu göndərilməsi haqqında da vəsatət qaldırdıq, təmin edilmədi, sonraya saxlandı".
Proses mayın 30-da davam edəcək.
Nicat Əliyev ötən il mayın 20-də tutulub. Bakı İstintaq Təcridxanasında saxlanan jurnalist qanunsuz olaraq narkotik vasitə saxlamada; qabaqcadan əlbir olan bir qrup şəxs və ya mütəşəkkil dəstə tərəfindən müvafiq razılıq olmadan dini təyinatlı ədəbiyyatı, əşyaları və dini məzmunlu başqa məlumat materiallarını istehsal etmə, satış və ya yayma məqsədi ilə idxal etmə, satma və ya yaymada; bir qrup şəxs tərəfindən hakimiyyətin zorla ələ keçirilməsinə, zorla saxlanılmasına və ya Azərbaycan Respublikasının konstitusiya quruluşunun zorla dəyişdirilməsinə və ya ərazi bütövlüyünün parçalanmasına yönələn açıq çağırışlarda; mütəşəkkil dəstə tərəfindən milli, irqi, sosial və ya dini nifrət və düşmənçiliyin salınmasına, milli ləyaqətin alçaldılmasına, habelə milli, irqi və ya dini mənsubiyyətindən asılı olaraq vətəndaşların hüquqlarının məhdudlaşdırılmasına və ya üstünlüklərinin müəyyən edilməsinə yönələn hərəkətlərdə ittiham olunur.
AzNews.az