Ermənistan ərzaq qıtlığı ilə üz-üzədir – “Hədəf”də MÜZAKİRƏ

1 Oktyabr 2020 22:58 (UTC+04:00)

Bu gün dünyanın gözü Cənubi Qafqazda, Dağlıq Qarabağdadır. Azərbaycan Ordusu işğal olunmuş ərazilərini azad etmək üçün əks-hücum əməliyyatlarına başlayıb. Beş gündür davam edən əməliyyatlarda işğalçı Ermənistanın yüzlərlə hərbi-texniki vasitələri, canlı qüvvəsi məhv edilib. Məlumdur ki, dünyada həbri əməliyyatlar həm də resurs müharibəsi kimi qiymətləndirir. Azərbaycan Ordusunun qarşısında duruş gətirə bilməyən Ermənistan savaşın iqtisadi aspektində də böyük zərbələr almaqdadır. Onsuz da miskin, dilənçi kökündə olan işğalçı dövlətin müharibə nəticəsində iqtisadiyyatının qısa müddətdə tam çökəcəyi proqnozlaşdırılır.

AzNews.az-ın Trend-ə istinadən məlumatına görə, Azərbaycan Televiziyasının (AzTV) “Hədəf” analitik proqramında sözügedən məsələ müzakirəyə çıxarılıb. Verilişin qonaqları, İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı və Beynəlxalq Münasibətlərin Təhlili Mərkəzinin İdarə Heyətinin sədri Fərid Şəfiyev mövzu ətrafında fikirlərini bölüşüblər.

V.Qasımlı qətiyyətlə bildirib ki, Ermənistan hərbi əməliyyatlara tab gətirmədiyi kimi, resurs müharibəsinə də tab gətirə bilməyəcək. V.Qasımlı deyib ki, rəhbəri olduğu qurum müharibənin ilk 4 gününün təhlilini aparıb: “4 gün ərzində düşmənə endirilən zərbələr nəticəsində Ermənistanın təxminən 1.2 milyard ABŞ dollarından çox hərbi texnika və sursatı məhv edilib. İlk 4 gündə məhv edilən təkcə hərbi texnika və sursatın dəyəri Ermənistanın strateji valyuta ehtiyatlarının yarısına və dövlət büdcəsinin üçdə birinə bərabərdir”. İcraçı direktor vurğulayıb ki, Ermənistan milli valyutanın devalvasiyası və ərzaq qıtlığı kimi təhdidlərlə üz-üzədir.

Məsələnin siyasi aspektlərinə toxunan F.Şəfiyev isə bildirib ki, Azərbaycan Ordusunun gücü, qüdrəti və peşəkarlığı qarşısında duruş gətirə bilməyən Ermənistan dezinformasiyalar yaymaqla, yalan məlumatlarla öz cəmiyyətlərini və dünya ictimaiyyətini aldatmağa cəhd göstərir. O, qeyd edib ki, Ermənistan muzdluları Dağlıq Qarabağa gətirməklə terrorçu mahiyyətini bir daha nümayiş etdirməkdədir.