“E-sosial” portalının aktiv istifadəçisi 800 minə çatdı

16 Oktyabr 2020 20:38 (UTC+04:00)

Əmək və Əhalinin Sosial Müdafiəsi Nazirliyinin geniş funksional imkanlara malik “e-sosial” internet portalından aktiv şəkildə istifadə edənlərin sayı bu il də ciddi şəkildə artaraq 800 minə çatıb. Portaldan istifadə sayı isə 41,1 milyon dəfə olub.

AzNews.az-a daxil olan məlumata görə, ölkənin sosial reyestri olan portal vətəndaşlara onlar barədə əmək, məşğulluq, sosial müdafiə, pensiya, müavinət, əlillik, reabilitasiya və s. üzrə məlumatlara çıxış və 100-dən çox sosial xidmət növündən yaranmış hüquqları müqabilində onlayn rejimdə faydalanmaq imkanı yaradır. Portalın Android və İOS əməliyyat sistemləri üçün tətbiqləri də fəaliyyət göstərir.

Xatırladaq ki, beynəlxalq internet saytları üzrə istifadə statistikalarını paylaşan alexa.com saytının (ABŞ, San-Fransisko) bu ilin aprelində açıqladığı “Azərbaycanın top saytları” siyahısında e-sosial.az portalı ölkəmizdə ən çox müraciət olunan saytların ilk beşliyində (google.com, youtube.com, google.az, wikipedia.org saytları ilə birgə) qərar tutmuşdu.