Trampın müşaviri istefa verdi

1 Dekabr 2020 09:45 (UTC+04:00)

Stenford Universiteti yanında Huver İnstitutunun əməkdaşı Skott Atlas ABŞ Prezidenti Donald Trampın yeni növ koronavirusa qarşı mübarizə üzrə xüsusi müşaviri vəzifəsindən istefa verib.

AzNews.az bildirir ki, bu barədə “Fox News” telekanalı Atlasın bəyanatına istinadən xəbər verib.

“Mən Amerika Birləşmiş Ştatları Prezidentinin xüsusi müşaviri vəzifəsindən istefa verdiyimi bəyan edirəm”, - Atlas sənəddə qeyd edib.

O, “Amerika xalqının rifahı naminə işləmək” imkanına görə ABŞ-ın hazırkı Prezidentinə minnətdarlığını bildirib, həmçinin üzv olduğu Ağ Evin koronavirusla mübarizə üzrə işçi qrupunun pandemiyaya qarşı mübarizə səylərini qeyd edib.

Atlas bəyanatında ABŞ Prezidenti seçkilərində qələbəsini elan edən Demokrat Cozef Baydenin Administrasiyasının pandemiyaya qarşı mübarizədə səyləri azaltmayacağına ümid etdiyini bildirib. “Mən yeni komandaya ölkəni hazırkı böhrandan çıxarmaq yolunda ən xoş arzularımı bildirirəm”, - deyə o vurğulayıb.

Daha əvvəl, KİV-in məlumatına görə, Atlas işçi qrupun digər üzvləri tərəfindən tənqid edilib. Onun ölkənin baş infeksionisti, Milli Allergiya və İnfeksion Xəstəliklər İnstitutunun direktoru Entoni Fauçi, həmçinin Ağ Evin yeni növ koronavirusun yayılması ilə mübarizə üzrə koordinatoru Debora Birkslə mübahisələri olub.