İraqda 340 nəfər edam olunacaq

24 Yanvar 2021 15:48 (UTC+04:00)

İraq Prezidenti Administrasiyasında terror aktları və qətllər törətdiyinə görə ölüm cəzasına məhkum olunmuş 340 nəfərin edam olunması qaydası təsdiq edilib.

AzNews.az İraqın rəsmi informasiya agentliyinə istinadən bildirir ki, qərar bütün konstitusion və hüquqi aspektlərin araşdırılmasından və bütün şikayət vasitələrinin tükənməsindən sonra qəbul edilib.

Qeyd olunub ki, bu şəxslərin cəzalandırılması yanvarın 21-də Bağdadda törədilmiş və nəticədə 32 nəfərin həlak olduğu, 110 nəfərin yaralandığı terror aktından sonra bu təsdiq edilib.

DEAŞ terror təşkilatı ilə bağlı şəxslər İraqda “Terrorçuluğa qarşı mübarizə haqqında” qanunun 4-cü maddəsinə uyğun olaraq təqib olunurlar. Bu qanun faktiki olaraq terror aktları həyata keçirən və ya onların təşkilatında iştirak edən hər kəs üçün ölüm cəzası nəzərdə tutur.

İraq Konstitusiyasına görə, ölüm hökmünün icrası Prezidentin təsdiqindən sonra həyata keçirilir.

Qeyd edək ki, yanvarın 21-də Bağdadda kamikadzenin iştirakı ilə törədilmiş terror aktı nəticəsində 32 nəfər həlak olub, 110 nəfər yaralanıb. Terror aktına görə məsuliyyəti DEAŞ terror təşkilatı öz üzərinə götürüb.